لەماوەی دەستبەکاربوونی وەک سەرۆکی ویلایەتە یەکگرتووەکانی ئەمریکا، ئەمە دووەم پەیوەندیی تەلەفونی جۆ بایدنە لەگەڵ هاوتا چینییەکەی، بەگوێرەی راگەیەندراوەکەی کۆشکی سپیش، "سەرۆکی چین و هاوتا ئەمریکییەکەی گفتوگۆی بەرژەوەندییە هاوبەش، مەیدانەکانی کارپێکەوەیی و هاوبەشی نێوانیان کردووە."

تایبەت بە پەیوەندییە تەلەفۆنییەکەی سەرۆکانی چین و ئەمریکا، میدیای فەرمی چین بڵاویکردووەتەوە، "لە پەیوەندییەکەدا گفتوگۆ و ستراتیژیی فراوانلە چەندین بواردا ئەنجامدراوە."

لەسەردەمی دۆناڵد ترەمپیشدا و لەماوەی شەش مانگی یەکەمی ئیدارەکەیدا، دۆناڵد ترەمپ سەرۆکی ئەوکاتی ئەمریکا دوو جار لەرێگای پەیوەندی تەلەفونییەوە لەگەڵ هاوتا چینییەکەی قسەیکرد، سەرباری ئەوەش، بەفەرمیی بانگهێشتی کۆشکی سپی کرد و پێکەوە و دوو بەدوو گفتوگۆیان کرد.

لەلایەکی تریشەوە، بەرپرسێکی باڵای کۆشکی سپی ئاشکرایکردووە، "پەیوەندییە تەلەفونییەکە لەسەر داوای جۆ بایدنی سەرۆکی ویلایەتە یەکگرتووەکانی ئەمریکا بووە.

پەیوەندییەکانی نێوان ویلایەتە یەکگرتووەکانی ئەمریکا و چین، ماوەی چەند ساڵێکە بەرەو ئاستێکی توندی ملاملانێ رۆشتووە و هەردوو وڵات لەسەر ئاستی باڵا، لەسەر چەند پرسێک ناکۆکن لەوانەش، هەژموونی چین بەسەر ئابووری جیهانیدا، دەستێوەردانی ئەمریکا لەکاروباری نێوخۆی چین، مافەکانی مرۆڤ و چەند پرسێکی دیکەش.