راوێژکاری دارایی و ئابوری سەرۆک وەزیرانی عێراق رایگەیاند، بەرزی بەهای دۆلار لە ناوخۆی عێراق کاتییە و کاتێک بازاڕە ناوخۆییەکان و بانکەکان گەیشتنە سەقامگیری هاوسەنگ کۆتایی دێت. دەشڵێت، "بەرزبوونەوەی لە ناکاوی نرخی دۆلار پەیوەندی بە جێبەجێکردنی رێکارەکانەوە هەیە".
مەزهەر محەمەد راوێژکاری دارایی و ئابوری محەمەد شیاع سودانی سەرۆک وەزیرانی عێراق بە میدیا ناوخۆییەکانی راگەیاند، بەردەوامی بەرزبوونەوەی بەهای دۆلار لە عێراق تەنها چەند قۆناغێکە و کاتێک گەیشتە قۆناغی هاوسەنگی خۆی کۆتایی دێت.
ئاماژەی بەوەشدا، پابەندبوونی
بانکە ناوخۆییەکانی عێراق لە کارکردنیان وەک بانکە جیهیانییەکان لە ئاستێکی باشدایە
و هەڵگەڕانەوەی نرخی دۆلار لە بازاڕە ناوخۆییەکان تەنها ماوەیەک دەخایەنێت.
باسی لەوەشکرد، بەرزی بەهای
دۆلار کێشەیەکی کاتییە و لە کاتی یەکگرتنەوەی سەقامگیری بازاڕەکان و بانکەکان کۆتایی
دێت.
راوێژکاری دارایی و ئابوری
سەرۆک وەزیرانی عێراق باسی لەوەشکرد، بەرزبوونەوەی لە ناکاوی نرخی دۆلار پەیوەندی
بە پابەندبوون بە رێکارە بانکی و نەختینەییەکانەوە هەیە.
ئەمە لەکاتێکدایە، لەماوەی
رابردوودا بەهۆی کردنەوەی سەکۆی ئەلیکترۆنی بۆ ئاڵوگۆڕی دراو و لەلایەن بانکی ناوەندی
عێراق و بلۆک کردنی چەند بانکێکی عێراقی لەلایەن وەزارەتی گەنجینەی ئەمریکاوە بە تۆمەتی
سپیکردنەوەی دۆلارەوە، بەشێوەیەکی بەرچاو نرخی دۆلار بەرامبەر دینار بەرزبووە و
نرخی ١٠٠ دۆلار گەیشتە زیاتر لە ١٧٠ هەزار دینار. لەبەرامبەردا بانکی ناوەندی عێراق
بە ئامانجی جێگیرکردنی نرخی دۆلار و سەقامگیرکردنی بازاڕی دراوەکان چەند رێکارێکی
گرتەبەر.