لە پارێزگای ریزەی تورکیا، بەھۆی بارانی بەخوڕەوە چەند رێگایەک داخراون و زیان بەر زەویە کشتوکاڵییەکان کەوتووە و چەند ناوچەیەکیش توشی لافاو بوونەتەوە، پێچەوانەی ئەوەش، لە عێراقی هاوسێی تورکیا؛ گەرما تەنگی بە هاوڵاتیان هەڵچنیوە و کەمیان دەتوانن لە کاتەکانی نیوەڕۆدا لە دەرەوە بن.

له‌ دوای نیوەڕۆی دوێنێ چوارشەممەوە پارێزگای ریزەی تورکیا دووچاری بارانێکی بەلێزمە و لافاو بووەتەوە، ئاوەڕۆکانی بەشێکی گەڕەک و شارۆچکەکانی گیراون و بەھۆی زۆریی بارانەوە ئاوی چەمەکانی ئاشکلار و شاعیرلەری شارۆچکەکە زیادیكردووە و بووەتە‌ لافاو. داواش لە گوندنیشنانی لێواری چەمەکان کراوە لە ماڵەکانیان نەچنە دەرەوە، هۆشداری ئەوەش دراوە کە بارانەکە بۆ ماوەیەکی دیکەش ئەگەری بەردەوام بوونی هەیە.

هەر لە باران و لافاوەکەدا و لە ئەنجامی رۆچوونی زەوی بەھۆی بارانی زۆرەوە لە شارەدێی بویوککۆی، خانوویەکی چۆڵکراو رووخا و چەند هاوڵاتییەکیش بەهۆی داخرانی رێگاکانەوە گیریان خواردووە.

ھاوکات، بەھۆی بارانی بەخوڕ و ماوە ماوە دروستبوونی لافاوەوە، رێگاکانی گوندی ئیسڵاحییە سەربە شارۆچکەی گونەیسو و گوندی لەڤەنتی سەربە شارۆچکەی ھەمشین داخران و زەوییە کشتوکاڵییەکانی گوندی ئیشکڵیی سەربە شارۆچکەی ئاردەشین، دووچاری زیان بوونەتەوە.

تیمەکانی ئیدارەی تایبەتی پارێزگاکە و شارەوانی، بەھۆی بەردەوامبوونی باران و مەترسییەکانی رۆچوونی زەوی، ئۆتۆمبێلە قورسەکان بەکارناھێنن.

لە عێراقیشدا کە تورکیا هاوسێیەتی و هاوسنورن، شەپۆلی گەرما رووی لەم ناوچەیە کردووە، سەرەڕای ئەوەی مانگی تەمموزە و هاوڵاتیان پێی دەڵێن 'گەرمەی هاوین' بەڵام شەپۆلی گەرمای دیکە هەیە و لە هەندێک شوێندا پلەکانی گەرما دەگەنە سەرو ٤٨ بۆ ٥٠ پلەی سیلیزی.

کەشناسی و بەرپرسانی تەندروستی هۆشداریان داوەتە هاوڵاتیان کە لە کاتەکانی نیوەڕۆ و بەتایبەت لە کاتژمێرەکانی ١١ی پێشنیوەڕۆ بۆ ٤ی عەسردا، نەچنە دەرەوە و هەتاو لێیان نەدات، چونکە گەرما و تیشکی خۆرەکە زیانی بۆیان دەبێت.

لە هەندێک شوێنیشدا، ئەوەندەی بە شەوان بازاڕەکان دەکرێنەوە و هاوڵاتیان بۆی دەچن، بە رۆژدا بەو جۆرە نییە.