سەردێڕ:

وەزیرى دەرەوەى عێراق: هیچ هۆكارێک نییه‌ بۆ دواخستنی هه‌ڵبژاردن

PM:01:22:27/08/2021

2400 جار خوێندراوەتەوە

وه‌زیری ده‌ره‌وه‌ی عێراق رایگەیاند، هیچ هۆكارێك نییه‌ بۆ دواخستنی هه‌ڵبژاردنه‌كان و پرۆسه‌كه‌ له‌واده‌ی دیاریكراوی خۆیدا ئه‌نجامده‌درێت.


فوئاد حسێن وه‌زیری ده‌ره‌وه‌ی عێراق له‌ چاوپێكه‌وتنێكدا له‌گه‌ڵ ماڵپه‌ڕی روسیا توده‌ی ئاماژەی بەوەکرد، هەڵبژاردن لە وادای خۆیدا دەکرێت بڕیارێكی نێوده‌وڵه‌تیش هه‌یه‌ بۆ پشتگیریكردنی پرۆسه‌ی هه‌ڵبژاردن له‌ رووی سیاسی و داراییه‌وه‌.

بڕیارە لە رۆژی ١٠ی ١٠ی ئەمساڵدا هەڵبژاردنی پەرلەمانی عێراق بەڕێوەبچێت و هەر سێ سەرۆکایەتییەکەی عێراق و ژمارەیەکی زۆر لە پارتە سیاسییەکان و وڵاتانی نێودەوڵەتی و نەتەوەیەکگرتووەکان جەخت لەئەنجامدانی هەڵبژاردنەکان لەکاتی خۆیدا دەکەنەوە، هاوکات رەوتی سەدریش بەشدارینەکردنی لە هەڵبژاردنەکە راگەیاندووە.

رۆژی چوارشەممەی رابردووش، لە میانەی کۆبوونەوەی ئەنجومەنی گشتی نەتەوەیەکگرتووەکاندا، جینین پلاسخارت نێردەى نەتەوەیەکگرتووەکان بۆ عێراق رایگەیاند، "پێویستە هەڵبژاردن لەکاتی خۆیدا بکرێت و هەموو عێراقییەکان بەشداری هەڵبژاردن بکەن تاوەکو هیوایەکی نوێ بهێننە ئاراوە."

پێشتریش، جومانە غەلای وتەبێژی کۆمسیۆنی باڵای هەڵبژاردنەکانی عێراق وتبووی، جگە لە چاودێرانی ناوخۆیی و هەرێمی، هەریەکە لە یەکێتی ئەوروپا و نەتەوەیەکگرتووەکان زیاتر لە ٣٠٠ چاودێر بۆ هەڵبژاردنی داهاتووی پەرلەمان دەنێرنە عێراق.

فوئاد حسێن لەبارەی کشانەوەی هێزەکانی ئەمریکا لە ئەفغانستان باسی لەوەشکرد، به‌راوردكردنی بارودۆخی نێوان عێراق و ئه‌فغانستان لەبارەی كشانه‌وه‌ی هێزه‌كانی ئه‌مریكا هه‌ڵه‌یەکی گەورەیە، به‌تایبه‌ت له‌ئێستادا كه‌ هێزه‌كانی ئه‌مریكا له‌ عێراق ژماره‌یان زۆر كه‌متره‌ له‌و هێزانه‌ی پێشتر له‌ ئه‌فغانستان بوون.

وه‌زیری ده‌ره‌وه‌ی عێراق له‌باره‌ی كێشه‌ی په‌نابه‌رانەوە رایگه‌یاند، به ‌بایه‌خه‌وه‌ له‌ كێشه‌ی په‌نابه‌رانی عێراقی له‌ بیلاروس و لیتوانیا ده‌ڕوانن، گه‌شته‌كانیشیان بۆ مینسك هه‌ڵپه‌ساردووه‌.








گەلەری