سەردێڕ:

یونیسێف: ٣٥ منداڵ لە عێراق بە تەقینەوەی مین گیانیان له‌ده‌ستداوه‌

PM:12:10:27/08/2021

1696 جار خوێندراوەتەوە

سندوقی هاریکاریکردنی منداڵانی سەر بە نەتەوەیەکگرتووەکان (یونیسێف) بڵاویكرده‌وه‌، لە هەشت مانگی ساڵی ٢٠٢١دا لە عێراق ٣٥ منداڵ بەهۆی تەقینەوەی مین و تەقەمنییەکانی پاشماوەی جەنگ گیانیان لەدەستداوە و ٤١ منداڵی دیکەش برینداربوون.


شیما سان گوبتا نوێنەری یونیسێف لە عێراق لە راگەیەندراوێکدا ئاشكرایكرد، نەتەوەیەکگرتووەکان لە مانگی کانوونی دووەم تاوەکو ئابی ٢٠٢١، کوژرانی ٣٥ منداڵ و برینداربوونی ٤١ی دیکەی بەهۆی تەقینەوەی مین و پاشماوەی جەنگەوە تۆمارکردووە.

لە راگەیەندراوەکەدا ئەوەش خراوەتەڕوو، ژمارەکە بەراود بە ساڵی ٢٠٢٠ رووی لە هەڵکشان کردووە بە جۆرێک لەو ساڵەدا تەنها کوژرانی شەش منداڵ و برینداربوونی ١٢ی دیکە بەهۆی تەقینەوەی پاشماوەکانی جەنگ لەلایەن نەتەوەیەکگرتووەکانەوە تۆمارکراوە.

یونیسێف نیگەرانی خۆی لە زیادبوونی کوژراو و بریندار بوونی منداڵان بەهۆی تەقینەوەی پاشماوەکانی جەنگ لە عێراق لە ماوەی مانگەکانی دواییدا نیشان داوە.

جێی ئاماژەیە، مین و تەقەمەنییە نەتەقیوەکان یەکێکن لە گەورەترین ئەو ئاستەنگانەی کە روبەڕوی حکومەتی عێراق بووەتەوە بۆ گەڕانەوەی ئاوارەکان بۆ ناوچە رزگارکراوەکانی ژێر دەستی داعش بە تایبەت لە هەردوو پارێزگای نەینەوا و کەرکوک، لەگەڵ بوونی ژمارەیەکی دیکە مین لە بەشێکی زۆر لە پارێزگاکانی عێراق و هەرێم کە مێژوەکەیان بۆ جەنگی کەنداوی یەک و جەنگی نێوان عێراق و ئێران (١٩٨٠-١٩٨٨) دەگەڕێتەوە.

بەپێی راپۆرتێکی روانگەی مینی زەمینی (Landmine Monitor)، عێراق یەکێک لە وڵاتانەیە کە لەسەر ئاستی جیهان زۆرترین روبەڕی خاکی وڵاته‌كه‌ی بە مین و پاشماوەکانی جەنگ پیس کراوە.








گەلەری