چاوگەکە لە زاری یاریدەدەرەکەی قائانییەوە ئەوەشی وتووە، "پەڕاوی چاکسازی سەدر وەرنەگرن و بە رێککەوتن لەگەڵ حزب و فراکسیۆنەکانی دیکەدا بەشداری هەڵبژاردنەکانی مانگی ١٠دا بکەن."

باسی لەوەشکردووە، ئێران ئارەزوو دەکات حکومەتی نوێی عێراق بەبێ موقتەدا سەدر پێکبهێنرێت.

هەر ئەمڕۆ، مستەفا کازمی سەرۆکوەزیرانى عێراق رایگەیاند، هەڵبژاردن دوای مانگ و نیوێکی دیکە و لە وادەی خۆیدا بەڕێوەدەچێت.

بڕیارە لە رۆژی ١٠ی ١٠ی ئەمساڵدا هەڵبژاردنی پەرلەمانی عێراق بەڕێوەبچێت و هەر سێ سەرۆکایەتییەکەی عێراق و ژمارەیەکی زۆر لە پارتە سیاسییەکان و وڵاتانی نێودەوڵەتی و نەتەوەیەکگرتووەکان جەخت لەئەنجامدانی هەڵبژاردنەکان لەکاتی خۆیدا دەکەنەوە، هاوکات رەوتی سەدریش بەشدارینەکردنی لە هەڵبژاردنەکە راگەیاندووە.

دوێنێش، لە میانەی کۆبوونەوەی ئەنجومەنی گشتی نەتەوەیەکگرتووەکاندا، جینین پلاسخارت نێردەى نەتەوەیەکگرتووەکان بۆ عێراق رایگەیاند، "پێویستە هەڵبژاردن لەکاتی خۆیدا بکرێت و هەموو عێراقییەکان بەشداری هەڵبژاردن بکەن تاوەکو هیوایەکی نوێ بهێننە ئاراوە."

پێشتریش، جومانە غەلای وتەبێژی کۆمسیۆنی باڵای هەڵبژاردنەکانی عێراق وتبووی، جگە لە چاودێرانی ناوخۆیی و هەرێمی، هەریەکە لە یەکێتی ئەوروپا و نەتەوەیەکگرتووەکان زیاتر لە ٣٠٠ چاودێر بۆ هەڵبژاردنی داهاتووی پەرلەمان دەنێرنە عێراق.