سەردێڕ:

ئەمەریکا چارەنووسیى منداڵە ساواکەى ئەفغانستانى ئاشکرا کرد

AM:11:27:21/08/2021

72088 جار خوێندراوەتەوە

بڵاوبوونەوەی گرتەیەکى ڤیدیۆیی رادەستکردنی منداڵێکی ساوای ئەفغانستان لەلایەن دایک و باوکیەوە بەنێو تەلى فڕۆکەخانەى کابوڵ بە هێزەکانی ئەمەریکا لەتۆڕە کۆمەڵایەتیەکاندا کاردانەوەی زۆری بەدوای خۆیدا هێنا.


جەیمس ستینجەر، وتەبێژی هێزە دەریاییەکانی ئەمەریکا لەبارەى چارەنووسى منداڵە ساواکە رایگەیاند "دۆخی تەندروستى منداڵەکە باشە و لەگەڵ دایک و باوکى و خێزانەکەیدا یەکیانگرتووەتەوە".

ئاماژەی بەوەشدا، دوای وەرگرتنی منداڵەکە لە دایك و باوکی گوازراوەتەوە بۆ یەکەی پزیشکی تایبەت بە هێزەکانی ئەمەریکا و چاودێری کراوە.

جەیمس ئەوەشی خستووەتەڕوو، منداڵەکە لەگەڵ دایک و باوکیدایە و ئێستا لەشوێنێکی ئارامی فرۆکەخانەکەدان.

دوای ئەوەی هێزەکانی ئەمەریکا لە ئەفغانستان کشانەوە، خەڵکی ئەو وڵاتە روویانکردەوە فرۆکەخانەی حامید کارزای لەکابوڵی پایتەخت بۆ ئەوەی کۆچ بۆ دەرەوەی وڵات بکەن و لەژێر دەستی بزوتنەوەی تاڵیبان نەمێننەوە و لە چەند گرتەیەکی تردا دایکان و باوکان دەردەکەوون کە منداڵەکانیان بەسەر دیوارێکى تەلڕێژکراودا رادەستی هێزەکانی ئەمەریکا دەکەن.

ئەمە لەکاتێکدایە، لە سەرەتای مانگی تەمموزی رابردوو، بەبریارێکی سەرۆکی ئەمەریکا سەرجەم هێزەکانی ئەو وڵاتە لە ئەفغانستان کشێنرانەوە و بزوتنەوەی تاڵیبان دەستیکرد بە شەڕ و زۆربەی شارەکانی کۆنترۆڵکرد و دەستی بەسەر کابوڵی پایتەخت و کۆشکی سەرۆکایەتیداگرت و حکومەتی ئەفغانستان رووخا و سەرۆکى ئەو وڵاتەش بەرەو تاجیکستان هەڵهات و ئێستا نیشتەجێی ئیماڕاتە.








گەلەری