مەسعود بارزانی لەگەڵ ئەندامانی فراکسیۆنی پارتی لە بەغدا کۆبووەوە و لە کۆبوونەوەکەدا رایگەیاند، پارتی لەگەڵ ناکۆکی و قووڵبوونی قەیرانەکان نییە.
مەسعود بارزانی سەرۆکی پارتی دیموکراتی کوردستان لەو کۆبوونەوەیەدا بارودۆخی سیاسی عێراق و دوایین ھەنگاو و گۆڕانکارییەکانی ناو پڕۆسەی سیاسی عێراقی لەگەڵ ئەندامەکان تاوتوێ کردووە.
مەسعود بارزانی
لە کۆبوونەوەکەدا باسی لەوەکردووە، "گۆڕانکارییە سیاسیەکان و هاوکێشەکان ھەر
چۆنێک بن ئێمە خاوەنی دۆزێکی ڕەواین و پێمانوایە کە دەبێت گرفتەکان لە ڕێگەی پابەندبوون
بە دەستور و ڕەچاوکردنی ھەر سێ پڕەنسیپی شەراکەت و تەوافوق و تەوازن چارەسەر بکرێت
و ئەم پڕەنسیپانە دەبێت لەسەر کاری حکومەتی داھاتوو و ھەموو کوتلە سیاسیەکان ڕەنگبداتەوە."
ئەوەشی
خستووەتەڕوو، "پارتی لەگەڵ ناکۆکی و قووڵبوونەوەی قەیرانەکان نییە، بەڵکو ئەوەی
بەلایەوە گرنگە پاراستنی مافە دەستورییەکان و کەرامەتی ھاوڵاتیانە."
ئاماژەی
بەوەشکردووە، "پێویستە ئەندامانی فراکسیۆنی پارتی لە ئەنجومەنی نوێنەرانی عێراق
خۆیان بە خزمەتکاری ھاوڵاتیان و دەنگدەران و خۆیان بە بەرگریکاری مافەکانی خەڵک
بزانن و کرداریان زیاتر بێت لە قسەکردن."