سەردێڕ:

وتەبێژی وەزارەتی تەندروستی: بڵاوبوونەوەی کۆلێرا لە هەرێم ئاسایی نییە

PM:09:52:21/06/2022

10224 جار خوێندراوەتەوە

وتەبێژی وەزارەتی تەندروستی رایگەیاند، بڵاوبوونەوەی کۆلێرا لە هەرێم ئاسایی نیە چونکە ناکرێت وڵاتێک ئاوی خواردنەوەی پاک نەبێت.


ئاسۆ حەوێز وتەبێژی وەزارەتی تەندروستی رایگەیاند، سکچوون و رشانەوە پەتایەکی وەرزییە و لە وەرزی هاویندا زیاد دەبێت بەڵام لە ئێستادا حاڵەتەکانی ئەو پەتایە زۆربووە بە رادەیەک گومانی بۆ پزیشکان دروستکردووە و دوای پشکنین بۆیان دەرکەوتووە پەتاکە کۆلێرایە.

ئاماژەی بەوەشدا، بڵاوبوونەوەی کۆلێرا لە هەرێم ئاسایی نییە چونکە ناکرێت وڵاتێک ئاوی خواردنەوەی پاک نەبێت.

باسی لەوەشکرد، رانەگرتنی پاک و خاوێنی ئاوی خواردنەوە و خواردن و پاک و خاوێنی تاکە کەسی هۆکارن بۆ بڵاوونەبوونەوەی کۆلێرا و چەند رێگری لە هۆکارەکان بکرێت ئەوەنەش کەمتر بەکتریاکە بڵاودەبێتەوە.

هاوکات لەبارەی پاکی خواردن و خواردنەوەوە، وتەبێژی وەزارەتی تەندروستی ئەوەی خستەڕوو، خواردنێکی زۆری بەسەرچوو دێتە هەرێم و پێویستە هەموو لایەک هەماهەنگ بن بۆ رێگریکردن لێی. دەشڵێت، "کۆلێرا تاکە نەخۆشی نییە خۆراک و ئاوی پیس دەبنە هۆکار بۆی."

ئاسۆ حەوێز لەبارەی پاکوخاوێنی سەوزەوە ئاماژەی بەوەدا، پێش تۆمارکردنی حاڵەتی کۆلێرا وەزیری تەندروستی لەگەڵ وەزیری کشتوکاڵ کۆبووەتەوە بە مەبەستی پاراستنی ئاسایشی خۆراک و خواردنی سەوزە و خواردنی پیس کە راستەوخۆ پەیوەندی بە تەندروستی هاوڵاتییانەوە هەیە و دەشڵێت، "ئەو کێڵگانەی سەوزە کە روخێندران هۆکارێکی پەتای کۆلێرا بوون."

باسی لەوەشکرد، پەتاکە مەترسیدارە و رێکخراوی تەندروستی جیهانیش هۆشیاری لەبارەوە داوە و پێویست نییە هاوڵاتیان بترسن تەنها خۆیان بپارێزن و بە زوویی سەردانی نەخۆشخانەکان بکەن بەسە.

ئەمەش لە کاتێکدایە، وەزارەتی تەندروستی حکومەتی هەرێم پێشتر رایگەیاند، تیمەكانی پەتازانی بەپێی ستانداردی پەتازانی، رێژەی پشكنین بۆ دۆزینەوەی حاڵەتەكانی كۆلێرا ئەنجامدراوە و ژمارەیەک لە حاڵەتەكانی كۆلێرا لە تەمەنە جیاوازەكان لە هەردوو پارێزگای سلێمانی و هەولێر دەستنیشانكراون دوای پشتڕاستكردنەوەی تاقیگەیی.













گەلەری