سەردێڕ:

عێراق هەڵوێستی خۆی لەبارەی هێرشەکەی تورکیاوە راگەیاند

PM:03:25:17/06/2022

3116 جار خوێندراوەتەوە

وەزارەتی دەرەوەی عێراق رایگەیاند، سەرکۆنەی هێرشە موشەکییەکانی تورکیا بۆ سەر خاکی عێراق دەکات و دەڵێت، "ئەو هێرشانە بەزاندنی سەروەری خاکی عێراقە."


ئەمڕۆ هەینی، وەزارەتی دەرەوەی عێراق راگەیەندراوێکی لەبارەی هێرشەکانی دوێنێی سوپای تورکیا بڵاوکردەوە کە کردیە سەر ناحیەی سنونی قەزای شنگال و بەهۆیەوە چوار کەس گیانیان لەدەستدا و دەڵێت، "هێرشەکە دامەزراوەی حکومەت و ماڵی هاوڵاتیانی بەئامانج گرتووە."

ئاماژەی بەوەشکردووە، ئەوان بەتەواوی سەرکۆنەی ئەو جۆرە هێرشانە دەکەن و بەتەواوی بە بەزاندنی سنور و سەروری خاکی عێراق لێی دەڕوانن لەلایەن تورکیاوە.

دەشڵێت، ئەو جۆرە هێرشانە هەڕەشەییەکی جدییە لەسەر ئاسایشی هاوڵاتیانی عێراق.

راگەیەنراوەکە ئەوەشی خستووەتەڕوو، ئامانجی ئەم هێرشانەی تێکدانی ئاسایشی عێراق و سەقامگیری گەلەكەیەتی، و پێویستی بە هەڵوێستێكی یەكگرتوو هەیە بۆ رووبەڕووبوونەوەی.

باسی لەوەشکردووە، لە ئێستادا لێکۆڵینەوەی ورد لە رووداوەکە دەستی پێکردووە و پەڕاوی لێکۆڵینەوە کراوەتەوە لەبارەی ئەو دەستدرێژییەوە  و دوای بەدەستخستنی زانیارییەکان وەزارەت هەڵوێستی پێویستی دەبێت.

ئەمە لە کاتێکدایە، پێش نیوەڕۆی رۆژی پێنجشەممە لە ناحیەی سنونێ فڕۆکە جەنگییەکانی تورکیا بارەگاکانی ئاسایشی ئێزیدخانی سەر بە بەڕێوەبەرایەتی سەربەخۆی شنگالیان بۆمبباران کرد و تیایدا چوار کەس کە یەکێکیان منداڵێکی تەمەن ١١ ساڵ بوو گیانیلەدەستدا و چوار کەسی دیکەش برینداربوون.

هاوکات، بەیانی ئەمڕۆ لە هێرشێکی دیکەی فڕۆکەی بێ فڕۆکەوانی سوپای تورکیادا لە قەزای کەلاری سەر بە شاری سلێمانی چوار کەس گیانیان لەدەستدا و کەسێکی دیکەش بە سەختی بریندار بوو.

ئەمەش لە کاتیکدایە، لەماوەی چەند ساڵی رابردوودا تورکیا بەشێوەی ناوبەناو بۆمباران و هێرش و ئۆپەڕاسیۆن دەکاتە سەر هەرێمی کوردستان و لەبەرامبەریشدا دەسەڵاتدارانی هەرێمی کوردستان هەڵوێستێکی ئەوتۆیان نەبووە لەو بارەیەوە.













گەلەری