هاوکات، ئێن ئاڕ تی پەیوەندی کرد بە ڕاز کەریم بەڕێوەبەری راگەیاندنی پەروەدەی گشتی سلێمانی لەبارەی راگرتنی دەوامەوە و رایگەیاند، ئەو پشووەی حکومەتی عێراق بەهۆی خۆڵبارینەوە رایگەیاندوە هەرێم ناگرێتەوە و سبەینێ دەوامی ئاسایییە.

ئەمەش لە کاتیکدایە، کەمێک لەمەوبەر ئەمیندارێتی گشتی ئەنجومەنی وەزیرانی عێراق رایگەیاند، بەهۆی ئەو شەپۆلی خۆڵبارینەی سبەینێ روو لە وڵاتدەکات و بەهۆی خراپبوونی کەشوهەواوە دەوامی فەرمی لەسەرجەم دام و دەزگاکاندا بۆ سبەینێ دووشەممە راگیران.

هاوکات، هەر ئەمڕۆ شەممە، عەلی حەمید وەزیری پەروەردەی عێراق لە راگەیەنراوێکیدا ئاماژەی بەوەکردووە، بەگوێرەی پێشبینییەکانی تایبەت بە کەشوهەوا لەبارەی دروستبوونی شەپۆلی خۆڵبارینەوە و پێداگری و سووربوون لەسەر پاراستنی تەندروستی رۆڵەکان و خوێندکارەکان بڕیاردراوە بە دواخستنی تاقیکردنەوەکان.

ئەمە لەکاتێکدایە، عامر جابری وتەبێژی کەشناسی و بومەلەرزەزانی عێراق لە چاوپێکەوتنێکدا لەگەڵ ئێن ئاڕ تی رایگەیاند:" شەپۆلی خۆڵبارین لە سبەینێ یەکشەممەوە دەست پێ دەکات و تا رۆژی سێشەممەش بەردەوام دەبێت".

ئەوەشی خشتەڕوو، شەپۆلێکی خۆڵبارین روو لە زۆربەی پارێزگاکانی عێراق دەکات و هەرێمی کوردستانیش دەگرێتەوە. وتیشی: "٢٤ کاتژمێر چاودێری رەوشەکە دەکەن و پێشبینیش دەکەن پلەی گەرما ٤ بۆ ٥ پلە داببەزێت".

وتیشی، "خۆڵبارینەکە لە رۆژی دووشەممەدا چڕتر دەبێتەوە و بۆ بەیانی رۆژی سێشەممە وردە ردە کاریگەری شەپۆلەکە لاواز دەبێت و دۆخەکە ئاسایی دەبێتەوە."

ئاشکراشیکرد، خۆڵبارینەکە بە شێوەیەکی چڕتر لە ناوچەکانی باشور و ناوەڕاستی عێراق دەبێت و هەرێمی کوردستانش دەگرێتەوە.

هاوڵاتیانیشی ئاگادار کردەوە، شەپۆلەکە ئاساییە و چڕییەکەی وەک شەپۆلی خۆڵبارینەکەی هەفتەی پێشتر نابێت.

هەر ئەمڕۆ، سادق عەتییە شارەزای کەشناسی عێراق بە ئاژانسی فەرمی هەواڵی عێراقی راگەیاند، شەپۆلێکی خۆڵبارین روو لە هەرێم و عێراقدەکات و کاریگەرییەکەی بەشێوەیەکی چڕ لە شەوی یەکشەممە و رۆژی دووشەممەدا زیاتر دەبێت.

گۆران لوقمان، سلێمانی

ئیحسان سابر، سلێمانی

ل.ل

ك.ئـ