سەردێڕ:

وەزیری نەوتی عێراق لەبارەی چارەسەری کێشەکانی نەوتی هەرێمەوە روونکردنەوە دەدات

PM:06:33:08/08/2021

11556 جار خوێندراوەتەوە

وەزیری نەوتی عێراق لە یەکەم کۆبوونەوەیدا لەگەڵ وەزیری سامانە سروشتییەکانی هەرێم رایگەیاند، ئامادەن لە رێگەی گفتوگۆوە سەرجەم کێشەکانی نێوان هەولێر و بەغدا چارەسەربکەن.


ئەمڕۆ یەکشەممە، کەمال حەمید ئەتروشی وەزیری سامانە سروشتییەکانی هەرێم بە سەردانێک گەیشتە شاری بەغدا و لەلایەن ئیحسان عەبدولجەبار وەزیری نەوتی عێراق پێشوازی لێکرا.

لە کۆبوونەوەکەیاندا هەردوو وەزیر پێداگرییانکرد لەسەر شەفافبوونی ئیدارەدانی نەوتی عێراق. هەروەها، بڕیاردرا کاربکەن لەسەر چاسەرکردنی کێشەکانی نێوان هەولێر و بەغدا لە رێگەی گفتوگۆی بەردەوامەوە.

لەلایەن خۆیەوە کەمال حەمید ئەتروشی جەختیکردەوە لەسەر هاوکاریکردن و ئەنجامدانی کاری هاوبەش لەگەڵ وەزارەتی نەوتی عێراق بە ئامانجی باشتر کردنی کەرتی وەبەرهێنان لە کێڵگە نەوتی و گازییەکاندا.

ئاماژەی بەوەشدا، پرۆژەی هاوبەش دابمەزرێنن لە بواری بەرهەمهێنانی نەوتدا و رێککەوتنەکان بخرێنە بواری جێبەجێکردنەوە و هەنگاوبنرێت بۆ واژۆکردنی چەندین رێککەوتنی نوێ.

ئەمە لەکاتێکدایە، لە ٣١ی ئاداری ٢٠٢١ پرۆژە یاسای بودجەی عێراق جێبەجێکرا و بەگوێرەی مادەی ١١ی رێککەوتنی نێوان حکومەتی هەرێم و حکومەتی فیدڕاڵ، پێویستە حکومەتی هەرێم رۆژانە ٢٥٠ هەزار بەرمیل رادەستی کۆمپانیای سۆمۆ بدات و لە ٥٠% داهاتە نانەوتییەکان و داهاتی خاڵە سنورییەکان رادەستی عێراق بکات و لەبەرامبەردا حکومەتی فیدڕاڵ مانگانە شایستە داراییەکانی هەرێم رادەستی حکومەتی هەرێم بکات. بەڵام تا ئێستا رێککەوتنەکە و پابەندبوونەکەی بودجە نەخراوەتە بواری جێبەجێکردنەوەوە.









گەلەری