PM:01:03:19/04/2022
22100 جار خوێندراوەتەوە
بەڕێوەبەرایەتی گشتی هاتوچۆی عێراق رایگەیاند، سەرجەم ئەو بڕیارە تایبەتییانەی بۆ ماوەی مانگی رەمەزان لە بارەی رێگەدان بە رەشکردنی بەشێک لە جامی ئۆتۆمبێلەکانەوە دەرکرابوون هەڵوەشێنراونەتەوە و کاریان پیناکرێت.
ئەمڕۆ سێشەممە، یاس خوزەیر بەڕێوەبەری بەشی راگەیاندنی بەڕێوەبەرایەتی هاتوچۆی عێراق راگەیەنراوێکی بڵاوکردەوە و تیایدا هاتووە، بە لەبەرچاوگرتنی دۆخی ئەمنی وڵات تارق روبەیعی بەڕیوەبەری گشتی هاتوچۆی عێراق بڕیاریدا بە هەڵوەشاندنەوەی سەرجەم ئە بڕیارانەی بەشێوەی تایبەت و کاتی رێگەی دەدا شۆفێران بەشێک لە جامی ئۆتۆمبێلەکانیان رەشبکەن.
ئاماژەی بەوەشدا، سەرجەم ئەوانەی جامی ئۆتۆمبێلەکانیان رەشدەکەن بە
سەرپێچیکار دادەنرێن و بەگوێرەی یاسا مامەڵەیان لەگەڵ دەکرێت.
ئەمە لەکاتێکدایە، لەماوەی رابردوودا بەڕێوەبەرایەتی گشتی هاتوچۆی عێراق
بڕیاریدا بە رێگەدان بە شۆفێران بە رەشکردنی جامی دواوە و بەشێک لە جامە سێگۆشە
بچوکەکانی ئۆتۆمبێلەکانیان بەهۆکاری بەرزبوونەوەی پلەکانی گەرما لە مانگی
رەمەزاندا.
ئاماژەی بەوەشدابوو، بڕیارەکە تەنها ئەو ئۆتۆمبێلانە دەگرێتەوە کە
لەدەوەرەی وڵات هاوردەکرابوون.
