ئێران هۆشداری دەداتە ئەمریکا و چەند وڵاتێکی تر
ئێران هۆشداریی توند بە ئەمریكا و چەند وڵاتێكی ئەوروپا دەدات ئەگەر هاوكاری ئیسرائیل بكەن، دامەزراوەكانیان لەناوچەكە دەكرێنە ئامانج.
بۆ خۆتۆماركردن لە ئەپڵیكەیشنی (بیتاقە تەموینی)، بەرپرسێكی پسوڵەی خۆراك چەند زانیاری و بەرچاوڕوونییەكی گرنگ دەداتە هاوڵاتیان و دەڵێت، منداڵی تازە لەدایكبوو لەناو سیستمەکە تۆمار ناکرێت و ئەوانەشی مردوون بلۆك دەكرێن. دەشڵێت، زیادکردنی منداڵ و گۆڕینی بریکاری خۆراک لە شوێنێک بۆ شوێنێکی دیكە دوای تەواوبوونی پڕۆسەكە دەست پێدەکات، لەوەی ئێستادا ناكرێت.
وەزیری بەرگری ئیسرائیل دەڵێت، هێرشەکانیان بۆ سەر ئێران بەردەوام دەبن، بەرپرسانی ئێرانیش دەڵێن، هێرشەکانیان بۆسەر ئیسرائیل فراوان دەکەن و بنکەکانی سوپای ئەمریکاش دەگرێتەوە، ئەمریکاش هۆشداری دەداتە ئێران.
وەزارەتی پەروەردەی حکومەتی ماوەبەسەرچوو کاتی تاقیکردنەوەکانی دواخست لە کاتێکدا لە عێراق بەردەوامن.
سەرۆک وەزیرانی عێراق دەڵێت، بە هەماهەنگی لایەنە پەیوەندیدارەکان، کاردەکەن بۆ دەستبەجێ گەڕاندنەوەی حاجیان و سەرجەم گەشتیارە عێراقییەکان بۆ زێدی خۆیان.
کەشناسی هەرێم دەڵێت، خۆڵبارینێکی کەم ئاسمانی هەرێم دەگرێتەوە و پلەکانی گەرما بەراورد بە دوێنێ نزمدەبنەوە.
بەڕێوەبەری گشتیی بازرگانی هەرێم بە پەیامنێری ئێن ئاڕ تی راگەیاند، جمەجۆڵی بازرگانی و هاوردەکردنی خۆراک و کاڵا و پێداویستییەکان لە ئێرانەوە بۆ ناو هەرێم بەردەوامە و گرفتی کەمی خۆراک لە هەرێمدا نییە، وتیشی، هەر فرۆشیارێک نرخی خۆراک گرانتر لە نرخی خۆی بفرۆشێت رێکاری یاسایی بۆ دەگیرێتەبەر.
پەروەردەی عێراق دەڵێت، هەفتەی داهاتوو پشووی هاوینە بۆ سەرجەم قوتابخانە و ناوەندە پەروەردەییەکان دەستپێدەکات و تاقیکردنەوە نیشتیمانییەکان ناگرێتەوە.
میدیاکانی ئیسرائیل دەڵێن، ئێران هێرشی موشه‌كی زیاتری كرده سه‌ر وڵاتەکەیان و ناوچەیەکی نیشتەجێبونی لە ناوەڕاستی ئیسرائیلی کردە ئامانج، ئەمەش بووەهۆی کوژرانی کەسێک و برینداربونی ١٩ كه‌سی دیکە.
دەستەی فڕۆکەوانیی مەدەنیی ئوردن دەڵێت، ئەمڕۆ ئاسمانی وڵاتەکە بەڕووی گەشتە ئاسمانییەکاندا کرایەوە.
هەر ئۆنسەیەک زێڕ لە بازاڕەکانی جیهاندا، بە سێ هەزار و ٤٣٣ دۆلار مامەڵەی پێوەکرا و بەراورد بە دوێنێ بەرزبووەوە، نرخی زێڕی عەیارە ٢١یش بە ٧٠٩ هەزار دینارە.
دوای هێرشەکانی ئێران بۆ سەر ئیسرائیل وەک وەڵامدانەوەیەک بۆ دەستپێکی هێرشەکانی بەرەبەیانی دوێنێ، نەوتی خاوی برێنت زیاتر لە ٨٪ بەرزبووەوە و بە ٧٤ دۆلار و ٢٣ سەنت مامەڵەی پێوەکرا.
خوێندنی باڵای هەرێم دەڵێت، بەهۆی ناجێگیری بارودۆخی ئاسایشی ناوچەکە و هەرێمی کوردستان، بڕیاردرا بە دواخستنی پڕۆسەی خوێندن و تاقیکردنەوەکانی خولی یەکەم، دووەم لەسەرجەم زانکۆکان و ناوەندەکانی خوێندن، دەشڵێت،" سەرجەم کۆرسەکانى زمانى ئینگلیزى، پێداگۆجى، خول و راهێنانەکانی تایبەت بە وەزارەتەکەمان، بۆ ماوەى یەک هەفتە ئۆنڵاین بەڕێوەدەچێت" .
وەزارەتی ئەوقاف و کاروباری ئاینی دەڵێت، ئاگاداری سەرجەم قوتابخانەکانی سەربەوەزارەتیان دەکەنەوە، هەموو تاقیکردنەوەکان لە کاتی خۆیدا و بەپێی خشتەی دیاریکراوی خۆی بەڕێوەدەچێت.
وەزارەتی گواستنەوە و گەیاندنی هەرێم دەڵێت، دوای ئەوەی وەزارەتی پەروەردەی حکومەتی ماووەبەسەرچوو بڕیاری داوە کە تاقیکردنەوەکان هەفتەیەک دوابخرێت پێویست ناکات هێڵی ئینتەرنێت ببڕدرێت.
میدیاکانی ئیسرائیل دەڵێن، تا ئێستا نزیکەی ٦٠٠ موشەکی ئێرانی بەرە و ئیسرائیل هاوێژراوە و ژمارەی بریندارەکان لە ١٧ کەسەوە بۆ نزیکەی ٤٠ کەس بەرزبووەوە.
بەشی رۆشنبیری عێراق داوا لە هەموو ئەو خوێندکارە عێراقییانە دەکات کە لە زانکۆکانی ئێران دەخوێنن، ئێران بەجێبهێڵن.
وەزارەتی پەروەردەی هەرێم دەڵێت، لەبەر بەرژەوەندی گشتیی، لە سبەینێ رۆژی شەممە ١٤ـی حوزەیرانـی ٢٠٢٥ـەوە هەموو تاقیکردنەوەکان لە قوتابخانە حکومی و ناحکومیەکان دوادەخرێت.
میدیاکانی ئیسرائیل دەڵێت، لە هێرشە موشەكییەكەی ئێران بۆ سەر ناوچە جیاوازەكانی ئیسرائیل، ١٧ كەس برینداربوون، وەزارەتی بەرگری ئیسرائیلیش وتی، ئێران ١٥٠ موشەکی لەم هێرشەدا بەکارهێناوە.
ئاژانسی هەواڵی تەسنیم بڵاویکردەوە، دوو فڕۆكەی جەنگی ئیسرائیل خرایە خوارەوە و فڕۆكەوانێكی ژن بە دیل گیراوە و سوپای ئیسرائیلیش دەڵێت، هیچ فڕۆكەیەكیان نەكەوتووەتە خوارەوە و فڕۆكەوانیان بەدیل نەگیراوە
میدیاکانی ئێران دەڵێن، دووەم هێرشی موشەکی ئێران بۆ سەر ئیسرائیل دەستیپێکرد کە ژمارەیان ١٣٠ موشەکە و میدیاکانی ئیسرائیلیش دەڵێن، تا ئێستا زیاتر لە ١٠ کەس بەهۆی موشەکەکانی ئێرانەوە برینداربوون.
بەهۆی هێرشەکانی ئیسرائیل بۆ سەر ئێرانەوە، تەواوی هێزەکانی پێشمەرگە لە هەرێمی کوردستان و گەرمیان بەتایبەت کەوتنە حاڵەتی ئامادەباشیەوە.
رابەری باڵای ئیسلامی ئێران دەڵێت، هێرشەکانیان بۆ سەر ئیسرائیل دەستیپێکردووە، دەشڵێت، هێرشەکانیان بۆ سەر ئیسرائیل زۆرر توند دەبێت و ژیانیان لێ تاڵ دەکەن، میدیاکانی ئیسرائیلیش کەوتنە خوارەوەی چەند موشەکێکی لە تەلئەبیب پشتڕاستکردەوە.
فەرماندەی سوپای ئیسرائیل دەڵێت، لە هێرشەکانیان بۆ سەر بنکە سەربازی و دامەزراوە ئەتۆمییەکانی ئێران بەردەوام دەبن و هەروەها، دەنگی چەند تەقینەوەیەک لە تاران بیستراوە و خەڵکەکەشی ترس و دڵەڕاوکێیان لێ نیشتووە.
رابەری باڵای ئێران وتی، هێزە چەکدارەکانیان بە هێزەوە هەڵسوکەوت دەکەن و وەڵامی ئیسرائیل دەدەنەوە و دەشڵیت، ئیسرائیل بەبێ زیان لەم تاوانە رزگاری نابێت.
سه‌رۆكی فه‌ره‌نسا دەڵێت، ئێران مافی خۆیەتی هێرش بکاتە سەر ئیسرائیل و بەرگریی لە خۆی بکات، داواش لە لایەنەکان دەکات دان بە خۆیاندا بگرن و دەشڵێت، داوای راگرتنی هێرشەکانی ئیسرائیل دەکەن.
سەرۆک وەزیرانی عێراق و سەرۆکی پەرلەمانی عێراق، پابەندبوونی خۆیان بۆ پاراستنی عێراق لە پێشێلکردنی سەروەری وڵاتەکەیان دووپاتکردەوە و سەرکۆنەی هێرشەکانی ئیسرائیل بۆ سەر ئێران دەکەن.
سەرۆک وەزیرانى عێراق دەڵێت، رەتیدەكەنەوە خاك و ئاسمانی عێراق بۆ هێرش بۆسەر وڵاتانی دراوسێ بەكاربهێنرێت، بەرپرسی باڵیۆزخانەى ئەمریکاش بە سودانى وتووە وڵاتەکەی ناهێڵێت عێراق بخرێتە ناو ململانێکانەوە.
وەزیری ئەوقاف و کاروباری ئاینی دەڵێت، بڕیاریاندا بە گەڕانەوەی سەرجەم حاجیانی کوردستان بە رێگەی وشکانی و پڕۆسەی گەڕانەوە لە بەرەبەیانی ١٤ـی حوزەیران دەستپێدەکات.
سەرۆك وەزیرانی ئیسرائیل دەڵێت، پێشبینی دەكەن رووبەڕووی چەند شەپۆلێكی هێرشی ئێران ببنەوە و سەرۆکی ئەمریکاش دەڵێت، هەموو شتێکیان لە بارەی هێرشی ئیسرائیل بۆ سەر ئێران دەزانی.