جارەکادی ڤەگەڕاندنا تەرمێن کۆچبەرێن دەریایا مانش هاتە پاشخستن

AM:09:15:25/12/2021

648 جار خوێندراوەتەوە

+ -

بڕیاربوو سپێدەهیا ئەڤرۆ شەمبی ب رێیا بالەفڕخانەیا ناڤدەولەتیا هەولێرێ، تەرمێ ١٦ قوربانیێن دەریایا مانش بینن بۆ هەرێما کوردستانێ، لێ جارەکادی ئینانا تەرمان هاتە پاشخستن.

دەزگەهێ لوتکە بۆ کاروبارێن ئاوارە و پەنابەران ڕاگەهاند، سپێدەهیا ئەڤرۆ کەسوکارێ وان قوربانیان ل چاڤەڕێی وەرگرتنا تەرمێن وان کۆچبەران بوون کو بڕیاربوو بۆ هەرێمێ ب ڤەگەڕینن، لێ بۆ جارا دوێ و "بسەدەمێ هەبوونا مژێ گەشتا وێ بالەفڕا کو دێ کۆچبەران پێ ڤەگۆهێزن هاتە پاشخستن بۆ ٢٠ دەمژمێرێن دی".

کەسوکارێن کۆچبەران ژی کو ل بالەفڕخانەیێ چاڤەڕێی هاتنا تەرمان بوون و پشترا ب وانا ڕاگەهاند کو ٢٠ دەمژمێرێن دی تەرمێن وان دێ گەهنە هەرێمێ بەحسا وێیەکێ کر، پتریا وانا ژ رێیێن دوویر هاتینە لێ ل داوی دەمدا گوتە وان کو دێ تەرم درەنگتر گەهنە هەرێمێ.

رۆژا ٢١ی ڤێ مەهێ جوتیار عادل پەیڤدارێ حکومەتا هەرێمێ ئاماژە ب وێیەکێ کر، بۆ دەمێ مەهەکێ تەرمێ وان کۆچبەران کو خەلکێ هەرێما کوردستانێ نە، بسەدەمێ پاشداکەفتنا پرۆسەیا ناسینێ و پشتراستکرنا پەنجەمۆرێن وان پاشداکەتبوون.

هەڤدەم، بڕیارە تەرمێن کۆچبەران ل سپێدەهیا رۆژا شەمبی ل دەمژمێر ٤ و ٣٠ خولەک بگەهنە هەرێما کوردستانێ.

ل ٢٤ی مەها دەربازبووی، بەلەمەک ب ٥٠ سەرنشینان ڤە ل کەنارێن باژێرێ (کالیێ) بڕێکەفتبوون بۆ بەریتانیا، بن ئاڤکەفتن و ٣١ کەس کو پتریا وانا کوردبوون ژیانا خۆ ژ دەستدای.

هەڤدەم، دەستهەلاتدارێن فەڕەنسا ئەشکەراکر، ل دەمێ هەشت مەهێن دەربازبووی نێزیکی ١٥ هزار و ٤٠٠ کەسان بزاڤا دەربازکرنا دەریایا مانش کریە ب ئاراستەیێ ئاخا بەریتانیا.