PM:03:24:09/03/2025
444 جار خوێندراوەتەوە
+
-
شێروان شێروانی کو ئێکە ژ
زیندانیێن بەهدینان ئازادکرنا وی هاتە پاشخستن بۆ سوبەهی کو بڕیار بوو ئەڤرۆ بهێتە
ئازادکرن ب سەدەمێ تەمام نەبوونا رێکارێن یاسایی.
ئەڤرۆ ئێکشەمبی، رەمەزان ئەرتیسی،
پارێزەرێ شێروان شێروانی راگەهاند، ب سەدەمێ تەمام نەبوونا رێکارێن یاسایی و کارگێری
ئازادبوونا وی رۆژنامەڤانی بۆ سوبەهی هاتە پاشخستن.
هەڤدەم،
تا نها دیار نینە کەنگی روینشتنا دادگەهێ دێ هێتە کرن بۆ ئازادکرنا شێروان شێروانی
د دەمەکێدا دەمێ وی یێ یاسایی تەمام بوویە.
ئەڤە ژی د دەمەکێدایە، ل رۆژا
١٦ـەی هەیڤا ٢ سالا ٢٠٢١ێ، دادگەها تاوانێن هەولێرێ ب تۆهمەتا "تێکدانا ئاسایشا
نیشتیمانی" هەر ژ (شێروان شێروانی، ئەیاز ئەکرم، گوهدار محەممەد ئەمین، هاریوان
عیسا، شڤان سەعید)، ب شەش سالێن زیندانیکرنێ سزا دان.
هەروەسا، ل هەیڤا شوباتا ٢٠٢٢ێ،
ب بڕیارا نێچیرڤان بارزانی سەرۆکێ هەرێمێ ٥٠٪ ژ سزایێ شێروان شێروانی و ٦٠٪ ژ سزایێ
دەستەسەرکریێن دی هاتە کێمکرن.
هەڤدەم، بڕیاربوو ل هەیڤا ئەیلوولا
٢٠٢٣ێ، رۆژنامەڤان شێروان شێروانی بهێتە ئازادکرن، لێ دادگەها هەولێر لدیف ماددەیێن
٢٩٨ و ٢٩٥ تایبەت ب سەختەکرنێ ب چار سالان سزایێ زیندانیکرنا بۆ شێروان شێروانی دەرکر
و دەمێ دەستەسەرکرنا وی درێژکر.
دەربارێ تۆهمەتا سەختەکاریێ
ژلایێ شێروان شێروانی، رەمەزان ئەرتیسی پارێزەرێ رۆژنامەڤانێ ناڤبری راگەهاند، ل
سالا ٢٠٢٢ێ مە داخازا ئازادکرنا ب مەرج بۆ هەر ئێک ژ (ئەیاز ئەکرەم، شڤان سەعید،
هاریوان عیسا و گۆهدار محەممەد ئەمین) کر، لێ وی دەمی ژبەرکو (گۆهدار محەممەد ئەمین)
د ژوورا تاکە کەسی دابوو، داخاز کر ل جهێ وی (شێروان شێروانی) ئیمزایێ بکەت، شێروان
ژی ل جهێ وی ئیمزا کر، ژبەر ڤێ چەندێ دادگەهێ راگەهاند سەختەکاری کریە و بڕیارا
چار سالێن دی زیندانیکرنێ بۆ دەرکر.
دیڤدا پارێزەرێن شێروان شێروانی
داخازا تەمیزکرنا وێ بڕیار کر، رۆژا ٣٠ێ هەیڤا ١٠ سالا ٢٠٢٣ێ، دادگەهێ سزایێ وی ژ
چار سالان بۆ دوو سالان کێمکر.