PM:07:40:08/03/2025
856 جار خوێندراوەتەوە
+
-
پەرلەمانتارەکێ نەوەی نوێ
ل پەرلەمانێ کوردستانێ راگەهاند، بڕیارە سوبەهی رۆژنامەڤان شێروان شێروانی بهێتە
ئازادکرن.
ئەڤڕۆ شەمبی ٨ـێ ئادارێ،
شڤان سەعید پەرلەمانتارێ نەوەی نوێ ل پەرلەمانی کوردستانێ راگەهاند، سوبەهی ژڤانە
رۆژنامەڤان شێروان شێروانی پشتی کو ب زولم هاتییە زیندانیکرن، بهێتە ئازاد کرن.
ئەڤە دەمەکی دایە، ل
رۆژا ١٦ـەی هەیڤا ٢ سالا ٢٠٢١ێ، دادگەها تاوانێن هەولێرێ ب تۆهمەتا "تێکدانا
ئاسایشا نیشتیمانی" هەر ژ (شێروان شێروانی، ئەیاز ئەکرم، گوهدار محەممەد
ئەمین، هاریوان عیسا، شڤان سەعید)، ب شەش سالێن زیندانیکرنێ سزا دان.
هەروەسا، ل هەیڤا شوباتا
٢٠٢٢ێ، ب بڕیارا نێچیرڤان بارزانی سەرۆکێ هەرێمێ ٥٠٪ ژ سزایێ شێروان شێروانی و ٦٠٪
ژ سزایێ دەستەسەرکریێن دی هاتە کێمکرن.
هەڤدەم، بڕیاربوو ل
هەیڤا ئەیلوولا ٢٠٢٣ێ، رۆژنامەڤان شێروان شێروانی بهێتە ئازادکرن، لێ دادگەها
هەولێر لدیف ماددەیێن ٢٩٨ و ٢٩٥ تایبەت ب سەختەکرنێ ب چار سالان سزایێ زیندانیکرنا
بۆ شێروان شێروانی دەرکر و دەمێ دەستەسەرکرنا وی درێژکر.
دەربارێ تۆهمەتا
سەختەکاریێ ژلایێ شێروان شێروانی، رەمەزان ئەرتیسی پارێزەرێ رۆژنامەڤانێ ناڤبری
راگەهاند، ل سالا ٢٠٢٢ێ مە داخازا ئازادکرنا ب مەرج بۆ هەر ئێک ژ (ئەیاز ئەکرەم،
شڤان سەعید، هاریوان عیسا و گۆهدار محەممەد ئەمین) کر، لێ وی دەمی ژبەرکو (گۆهدار
محەممەد ئەمین) د ژوورا تاکە کەسی دابوو، داخاز کر ل جهێ وی (شێروان شێروانی)
ئیمزایێ بکەت، شێروان ژی ل جهێ وی ئیمزا کر، ژبەر ڤێ چەندێ دادگەهێ راگەهاند
سەختەکاری کریە و بڕیارا چار سالێن دی زیندانیکرنێ بۆ دەرکر.
دیڤدا پارێزەرێن شێروان
شێروانی داخازا تەمیزکرنا وێ بڕیار کر، رۆژا ٣٠ێ هەیڤا ١٠ سالا ٢٠٢٣ێ، دادگەهێ
سزایێ وی ژ چار سالان بۆ دوو سالان کێمکر.
پشتی ب دویماهیا هاتنا
سزایێ وی، بڕیارە سوبەهی ٩ێ ڤێ هەیڤێ رۆژنامەڤان شێروان شێروانی بهێتە ئازادکرن.