PM:07:24:08/03/2025
104 جار خوێندراوەتەوە
+
-
کۆمکارا عەرەبی دلگرانیا خۆ ل هەمبەر ڕەوشا ئەولەهیا چەند
ڕۆژێن بوری ل سوریا دەربڕی. داخاز دکەت، سەقامگیری و ئاشتییا مەدەنی ل سوریا زێدەتر
بهێتە کرن.
ئەڤرۆ شەمبی 8ێ ئادارێ، ئەمینداریەتیا گشتی یا کۆمکارا عەرەبی
ڕاگەهاندنەک لسەر ڕەوشا چەند ڕۆژێن بوری ل ڕۆژئاڤایێ سوریا بەلاڤکر و تێدا دلگرانیا
خۆ دەربڕی و سەرکۆنا کردەیێن توندوتیژی و ب ئارمانجگرتنا هێزێن ئەولەهیێ و دەستوەردانا
دەرەکی دکەت.
ئاماژە ب وێیەکێ ژیکر، دەستوەردانا دەرەکی ڕەوشێ ئالۆزتر
دکەت و دبیتە گەف بۆ سەر ئاشتیا وی وەلاتی.
هەڤدەم ئەمینداریەتیا گشتی یا کۆمکارا عەرەبی تەکەز ل سەر
وێ چەندێ کر کو ئەڤ ڕەوشە پێدڤی ب دان ب خۆ داگرتنێ و وان ڕێکارانە یێن دبنە ئەگەرێ
پاراستنا سەقامگیریێ و ئاشتیا ناڤخۆیی.
ئەڤە ژی پشتی وێ چەندێ دهێت، ڕۆژا پێنجشەمبییا بوری، شەر
و رووبڕوون دناڤبەرا هێزێن ئەولەهیا سوریا و ئالیگرێن ڕژێما بەرێ دەستپێکر، ئەڤە ژی
ئەحمەد شەرع و دەستهەلاتا وی ئێخستە بن پرسیارێ، زێدەباری وێ چەندێ کو ڕەوشا ئەمنی
یا بەشەک ژ باژێرێن سوریا، ب تایبەتی لازقیە و تەرتوس ب تەمامی تێکچوو، هندەک ژ
وان باژێر و باژێرۆکان گرۆپێن چەکداری یێن جودا هاتنە ناڤ کو د هەیاما 13 سالێن بوری
دا نەهاتبوونە دیتن.
هەروەسا ڕوانگەها سوری بۆ مافێ مرۆڤی ئاشکرا کریە، 340 وەلاتیێن
عەلەوی ل لازقیە و تەرتوس ب دەستێ هێزێن ئەمنی و گرۆپێن توندڕەو هاتنە کوشتن.
ئاماژە ب وێ چەندێ ژی کریە، 60 وەلاتیێن سڤیل دناڤ کوشتییان
دا هەنە کو 10 ژ وان ژنن و پێنج ژی زارۆکن، ئەڤ کۆم کوژییە ژی ل سەر بنەمایێ تایفی
و ناوچەیی هاتیە کرن، زێدەباری دزینا مال و سامانێن وان.
ڕوانگەهێ گوتیە ژی، ژ دەستپێکا ئالۆزییان ڤە، 524 کەس
هاتینە کوشتن، 213 کوشتی ژ چەکدارێن هەردوو ئالییان، 93 کەسێن دی ژی ژ هێزێن وەزارەتا
بەڕيڤانی و ناڤخۆ یا سوریا.