ئیڤان جابرۆ، وەزیرا کۆچ و کۆچبەرێن عێراقێ ڕاگەهاند، دەمێ داخستنا هەمی کەمپێن ئاوارەیان ل ٣٠ ڤێ مەهێ هاتیە درێژکرن و تا نها ب فەرمی دەمەک بۆ داخستنا هەمی کەمپان نەهاتیە دیارکرن.

ئاماژە ب وێیەکێ ژیکر، سەدەمێ درێژکرنا دەمێ داخستنا کەمپان هاڤکاری نەکرنە ژلایێ حکومەتا رێڤەبرنا کارێن هەرێمێ و ڤەگەراندنا ئاوارەیان بۆ وارێن وان.

ئەو یەکژی بەرچاڤکر، هەیاما شەش مەهانە هەرێم هەڤکار نەبوویە کو بچنە دناڤ کەمپان دا بۆ تۆمارکرنا ناڤێن وان ئاوارەیێن کو دڤێن ڤەگەرنە وارێن خۆ.

بەحسا وێیەکێ ژیکر، ژبلی وان ئاستەنگێن ژلایێ حکومەتا رێڤەبرنا کاران ڤە هاتینە دروستکرن، چەند ئاستەنگێن دی ژی هەنە لهەمبەر ڤەگەریانا ئاوارەیان بۆ دەڤەرێن خۆ.

ئەڤە ژی د دەمەکێدایە، ب مەرەما داوی ئینان ب کەیسا ئاوارەیان و داخستنا کەمپان، بەری نها وەزیرا کۆچ و کۆچبەرێن عێراقێ بڕیاردا بوو رۆژا ٣٠ـی حوزەیرانا ئەڤسالە هەمی کەمپان دابێخن و ئاوارەیان ڤەگەرینە وارێن وان، دیڤدا و جارەکا دی ئەو دەمە هاتە درێژکرن بۆ ٣٠ تەمموزێ.