PM:02:06:23/03/2024
428 جار خوێندراوەتەوە
+
-
پەیڤدارێ پۆلیسێن دهۆکێ بۆ ئێن ئاڕ تی ڕاگەهاند، تا نها زیان ب
زێدەتری هزار مالان کەفتیە ب سەدەمێ لەهیێ و ١٣ وەلاتی ژی برینداربووینە، گوت ژی،
" تا نها لێگەریان لدیف تەرمێ وان دوو کەسان بەردەوامە کو د لەهیا حەفتیا
دەربازبووی دا ژیانا خۆ ژدەستداین".
ئەڤرۆ سێشەمبی، بێوار عەبدولعەزیز پەیڤدارێ
بەرەڤانیا باژێرێ دهۆکێ بۆ ئێن ئاڕ تی ڕاگەهاند، ب سەدەمێ وێ لەهیا کو ل چەند
رۆژێن دەربازبووی ل دهۆکێ دروستبووی هزار و ٢٤٠ مالان زیان پێکەفت و د وێ رێژێ ژی
دا ١٧ مال ب تەمامی هەرفین.
ئاماژە ب وێیەکێ ژیکر، د ئەنجامێ وێ لەهیێ دا ١٣ کەس برینداربوون و سێ
کەسان ژی ژیانا خۆ ژدەستدان، گوت ژی، " د نها دا ژلایێ ئالیێن پەیوەندیدار ڤە
لێگەریان لدیف وان دوو تەرمان بەردەوامە لێ بسەدەمێ زۆریا لەهیێ ئەو کارە بزەحمەت
بوویە، داخازێ ژی ژ وەلاتیان دکەین هەڤکاربن ژ دیتنا تەرمان دا".
بەحسا وێیەکێ ژیکر، ژبەر کو تا نها هایداری دهێتە دان کو پێلەکا دی یا
باران بارینا بهێز دەڤەرێ ڤەگریت، هەمی تیمێن بەرەڤانیا باژێرێ د ئامادەباشیێ دانە
و داخازێ ژی ژ وەلاتیان دکەن، ژ مالێن خۆ دەرنەکەڤن و د هەر رەوشەکا نەچاڤەرێ کری
دا پەیوەندیێ ب هێلا ١١٥ـە بکەن.
ئەڤە ژی د دەمەکێدایە، رۆژا سێشەمبیا دەربازبووی ژ ئەنجامێ پێلەکا
باران بارینا بهێز لەهی ل دهۆکێ دروست بوو و ب وی سەدەمی، دوو وەلاتیان ژیانا خۆ ژدەستدان،
سنێلەکی ژی کو بزاڤ دکرن ب رێکا کێبلەکێ کارەبێ خۆ ژ لەهیێ رزگار بکەت کارەبێ گرت
و ژیانا خۆ ژدەستدا.