ئۆمتیتی هەموو نهێنیەکانی ئاشکراکرد

AM:11:14:19/10/2021

3532 جار خوێندراوەتەوە

+ -

ئۆمتیتی دوپاتیکردەوە کە بیر لەجێهێشتنی بەرشەلۆنە ناکاتەوە و نایەوێت یانەکە بەجێبهێڵێت.

ساموێل ئۆمتیتی لە چاوپێکەوتنێکی تەلەفزیۆنیدا ڕایگەیاند کە بەهیچ شێوەیەک نایەوێت لە مانگی یەکدا بەرشەلۆنە بەجێبهێڵێت و خۆی لەهیچ یانەیەکی تر نابینێتەوە و دەیەوێت لەگەڵ یانەکەی بەوەفابێت.

ئۆمتیتی دوپاتیکردەوە کە بەهۆی پێکانەکەیەوە بە بارودۆخێکی زۆر خراپدا تێپەڕیوە بەڵام ئێستا دوای چاکبونەوەی لەپێکانەکەی زۆرباشە و وەک هەموو یاریزانەکانی یانەکە دەیەوێت یارمەتی بەرشەلۆنە بدات بۆ سەرکەوتن.

دەربارەی یارینەکردنی ئۆمتیتی وتی: ڕاهێنەر ئەو کەسەیە کە بڕیار دەدات کێ لە یاریەکاندا بەشداری بکات کەواتە ئەگەر یارینەکەم ئەوا پێویستە زیاتر خۆم ماندووبکەم و ڕاهێنان بکەم بۆ ئەوەی نیشانی هەمووانی بدەم کە توانایەکی باشم هەیە.

تایبەت بە کۆمانیش ئەو یاریزانە وتی: هیوادارم ئەو هەموو ئەو هەوڵ و ماندوو بونەم ببینێت و هەمیشە چاوەڕێی هەلێکم تا تواناکانی خۆم بسەلمێنم.

ئۆمتیتی وتیشی: هەرگیز داوام لە ڕاهێنەر نەکردوە تا هەلێکم پێبدات چونکە ئەو بڕیار دەدات و منیش ناچارم پێیڕازیبم، من لەناو یاریگادا باشی خۆم دەسەلمێنم و داوای ئەوە لەو ناکەم.

ئەو بەرگریکارە ڕایگەیاند کاتێک قسە ناکەم خەڵک وادەزانن کە من هیچ ناکەم و ڕۆژانە تەنیا لە ماڵەوە دادەنیشم بەڵام من ڕۆژانە ڕاهێنان دەکەم بۆ ئەوەی باشتربم.

ئۆمتیتی ئاشکراشیکرد کە چەندین گرێبەستی جیاوازی بەدەست گەیشتووە بەڵام ئەو بەرشەلۆنەی خۆشدەوێت و نایەوێت یانەکە بەجێبهێڵێت و دوپاتیشیکردەوە تا کۆتایی گرێبەستەکەی لە یانەکە دەمێنێتەوە.

دەربارە ڕۆشتنی میسیش وتی: لەدەستدانی باشترین یاریزانی جیهان کارێکی قورسە بەڵام ژیان بەردەوامە، لیۆ زۆر یارمەتیداین بەڵام ئێستا پێویستە بەشێوەیەکی جیاوازتر یاریبکەین.