سەردێڕ:

نرخی بەنزین زیاتر بەرزبووەوە

فۆتۆ: 
2021-04-23

48561 جار خوێندراوەتەوە

پەیامنێری ئێن ئاڕتی رایگەیاند، ماوەی چەند رۆژێکە نرخی بەنزین بەرزتربووەتەوە، بەجۆرێک بۆ هەر لیترێک ٢٥ دینار زیادیکردووە.


گۆران لوقمان پەیامنێری ئێن ئاڕتی رایگەیاند، ماوەی چەند رۆژێکە نرخی بەنزین بەرزتربووەتەوە و لە ئێستادا نرخی هەر لیترێک بەنزینی نۆرماڵ  ٦٥٠ دینارە، لیترێک بەنزینی موحەسەن ٧٠٠ دینارە و لیترێک بەنزینی سۆپەریش ٧٧٥ دینارە.

لەبارەی هۆکاری بەرزبوونەوەی نرخی بەنزینیشەوە پەیامنێری ئێن ئاڕتی باسی لەوەکرد، کە بەرپرسانی سلێمانی هۆکارەکەی بەرزبوونەوەی بەهای نەوت و نرخی دۆلار بەرامبەر بەرامبەر دیناری عێراقی دەگەڕێننەوە.

پێشتر، لە چەند بۆنەیەکدا چەندین پەرلەمانتار وتوویانە، "بەشێک لە بەرپرسان سەرقاڵی کار بازرگانین بە بەنزینەوە و ئەمەش کاریگەری لەسەر نرخی بەنزین کردووە."

 

لە ماوەی رابردووشدا، پارێزگاری سلێمانی رایگەیاند، بەرزبوونەوەی نرخی بەنزین دەگەڕێتەوە بۆ بەرزبوونەوەی نرخی دۆلار لە عێراق و بەرزبوونەوەی نرخی نەوت لە بۆرسەدا و دانانی ئەو باجەی وەزارەتی سامانە سروشتیەکان لەسەر هاوردەکردنی سوتەمەنی دایناوە.