سەردێڕ:

پارێزگاری هەولێر: تا ئێستا زیانەکان دیار نین

فۆتۆ: 
2021-04-14

6001 جار خوێندراوەتەوە

پارێزگاری هەولێر بە میدیاکانی نزیک لە پارتی راگەیاند، "کاتژمێر نۆ و ٥٠ خولەک موشەکێک ئاڕاستەی هەولێر کراوە و لێکۆڵینەوە لەوبارەیەوە دەستیپێکردووە"، دەشڵێت، "هەولێر ئارامە و تا ئێستاش زیانەکان دیار نین."


ئومێد خۆشناو پارێزگاری هەولێر رایگەیاند، ئەمشەو موشەکێک ئاراستەی فڕۆکەخانەی نێودەوڵەتی هەولێر کراوە و زیانی گیانی نەبووە، 

پاش ئەوەی موشەکێک ئاڕاستەی فڕۆکەخانەی نێودەوڵەتی هەولێر کرا، ئومێد خۆشناو پارێزگاری هەولێر بە میدیاکانی نزیک لە پارتی راگەیاند، "تا ئێستا نازانرێت ئەو موشەکە لەکوێوە ئاڕاستە کراوە و بکەری هێرشەکەش کێیە"، دەشڵێت، "لێکۆڵینەوە لە رووداوەکە دەستیپێکردووە".

پارێزگاری هەولێر ئاماژەی بەوەشکردووە، "هێرشەکە لە کاتژمێر نۆ و ٥٠ خولەکی ئەمشەو بووە و تائێستاش دیار نییە کە ئایا بە موشەک یان کاتیۆشا بووە"، دەشڵێت، "بەهۆی هێرشەکەوە ئاگرێکی گەورە لەو ناوچەیە کەوتووەتەوە و لە ئێستاشدا تیمەکان لەشوێنی رووداوەکەن بۆ ئەوەی کۆنتڕۆڵی بکەن".


رۆژی ١٥ی شوباتی ئەمساڵیش، ژمارەیەک موشەک ئاڕاستەی شاری هەولێری پایتەختی هەرێم کران و تیایدا نزیکەی هەشت کەس بریندار بوون و کەسێکیش گیانی لەدەستدا، کە ئەوەش کاردانەوەی ناوخۆیی و نێودەوڵەتی لێکەوتەوە.

رۆژی ١٢ی ئەم مانگەش، ئەنجومەنى ئاسایشى هەرێم دانپێدانانى چەند کەسێکى بڵاوکردەوە و باسی لەوەدەکرد، ئەو کەسانە ئەندامی داعش بوون و بە نیازبوون بە بۆمبى چێنراو و دەمانچەى بێدەنگ لە هەولێر چەند هێرشێک ئەنجامبدەن.

هاوکات، مەسرور بارزانی سەرۆکی حکومەتی هەرێمی کوردستان رایگەیاند، "هێزە ئەمنییەكانمان سەرکەوتووانە پلانێکی تیرۆرستانی داعشیان لە هەولێر پوچه‌ڵكرده‌وه‌، كه‌ له‌ سوریاوه‌ پیلانەکە رێکخراوه‌ و ئاڕاستەکراوه."  

مەسرور بارزانی باسی لەوەشکردبوو، "داوا لە هاوپەیمانان و هاوبەشەکانمان دەکەم کە مەترسییەکانی ئەم هەڕەشەیە بۆ سەر ئاشتی و سەقامگیریی ھەرێمی کوردستان و دەرەوە  بە ھەند وەربگرن."