سەردێڕ:

حەشدی شەعبی ناوچەکانی جموجوڵی داعش بۆ ئێن ئاڕ تی ئاشکرا دەکات

فۆتۆ: 
2021-03-08

4184 جار خوێندراوەتەوە

فەرماندەی لیوای ٥٢ی هێزەکانی شەعبی رایگەیاند، گەڕان و بەدواداچوون لەو ناوچانەی کە چەکدارانی سەر بە گرووپی چەکداری داعشی تێدایە، بەهەماهەنگی لەگەڵ هێزەکانی پێشمەرگە بەردەوامە.


ئەمڕۆ دووشەممە، ئەحمەد جاسم فەرماندەی لیوای ٥٢ی هێزەکانی شەعبی بە ئێن ئاڕ تی راگەیاند، جموجوڵەکانی گروپی چەکداری داعش لە ناوچەکانی باکور بەتایبەتیش باشوری کەرکوک و ناوەڕاستی ناوچەکانی پارێزگای سەڵاحەدین و ناوچەکانی باکوری پارێزگای دیالە بەردەوامە.

فەرماندەی لیوای ٥٢ی هێزەکانی حەشدی شەعبی باسی لەوەشکردووە، ئەو ناوچانە لە چەند زنجیرە چیایەک پێکدێن و چەند ناوچەیەکی سەختیشی تێدایە، کە تیایدا گرووپی چەکداری داعش وەک پەناگە بەکاریان دەهێنن.

ئەحمەد جاسم ئاماژەی بەوەشکردووە، "بەداخەوە لەلایەن هەندێک کەس و لایەنەوە گرووپی چەکداری داعش پەنا دەدرێن و هاوکارییان دەکرێت و پاڵپشتی لۆجستییان بۆ دابین دەکرێت، بەڵام هەماهەنگی و پێکەوەکارکردنی هێزەکانی پۆلیس و حەشدی شەعبی و پێشمەرگە، هەڵمەتی گەڕان و پشکنین بۆ پاشماوەکانی چەکدارانی سەر بە داعش بەردەوامە."

دەشڵێت، "ئەو پاشماوانەی گروپی چەکداری داعش لەدەرەوەی سنوری عێراقەوە دێن و پاڵپشتی دەرەکیشیان هەیە".

ئەوەشی ووتوە، "لە ئەنجامی چالاکی و هەڵمەتەکانی ئەمدوایەی هێزە هاوبەشەکانیاندا، شوێنەواری دیار و ئاشکرای پاڵپشتی دەرەکیان بۆ پاشماوەکانی داعش لەو ناوچانە ئاشکرا کردووە."