سەردێڕ:

شێروان شێروانی بۆ لێكۆڵینەوە برایە بنکەی پۆلیس

پارێزەرەكەی شێروان شێروانی: من ئاگادار نەكراوم
فۆتۆ: 
2021-02-28

7025 جار خوێندراوەتەوە

بەشدار حەسەن پارێزەری شێروان شێروانی بە ئێن ئاڕ تی راگەیاند، ئەمڕۆ شێروان شێروانی بردرایە بنکەی پۆلیس بۆ ئیفادە لێوەرگرتن لەسەر سکاڵایەکی ئاسایشی هەولێر، کە گوایە لە رۆژی دادگاییکردنەکەیدا تەشهیری بە ئاسایش کردووە


بەشدار حەسەن ئەوەشی خستەڕوو، "راستییەکەی ئەوەیە دەترسن دادگای تەمیز سزای شەش ساڵ زیندانییەکە هەڵبوەشێنێتەوە و دەیانەوێت بەو کەیسە لە زیندان بیهێڵنەوە و سزاکەی زیاد بکەن."

پێشتر، دادگای تاوانی هه‌ولێر، سزای شەش ساڵ زیندانی بەسەر پێنج لە دەستگیرکراوانی بادیناندا سەپاند، ئەوەش ناڕەزایەتی و کاردانەوەى رای گشتی و بەشێک لەلایەنە سیاسیەکان و پەرلەمانتارانی بەدوای خۆیدا هێنا و بە بڕیارێکی نادادپەروەرانەی دەزانن.

هەر لەوبارەیەوە، نێچیرڤان بارزانی سەرۆکی هەرێمی کوردستان رایگەیاندبوو، بڕیاری دادگا بۆ سزادانی راگیراوەکانی بادینان دوابڕیار نییە، وتیشی، "هیچ کەس و لایەنێک مافی دەستوەردانیان لە کاروباری دادگادا نییە."

 

رۆژی ١٩ی ئەم مانگەش، باڵیۆزخانەی ئەمریکا لە بەغدا رایگەیاند، بە وردی چاودێری دەستگیرکردن و پاشان دادگایکردنەکانی ئەم دواییەی رۆژنامەنوسان و چالاکوانانیان کردووە. راشیگەیاند، پێشتریش لەبارەی ئازادی رادەربڕینەوە گفتوگۆیان لەگەڵ حکومەتی هەرێمی کوردستاندا کردووە و لە داهاتووشدا دەیکەن.

لە پاش پەیامەکەی باڵیۆزخانەی ئەمریکا لە بەغدا، مەسرور بارزانی سەرۆکی حکومەتی هەرێمی کوردستان رایگەیاند، داوا لە هەموو لایەک دەکات کە "رێز" لە سیستمی دادوەریی هەرێمی کوردستان بگرن.

رۆژی ٢٨ی ئەم مانگەش، هاوسەری رۆژنامەنوس شێروان شێروانی بە ئێن ئاڕ تی رایگەیاند، "کاتێک بۆ یەکەمجار بۆ پێنج خولەک سەردانی شێروانم کرد دواتر لێی پرسیم ئەوکاتەی لای من رۆیشتیت هیچ هەڕەشەیەکت لێکراوە پێم وت، نەخێر ئێستا تێدەگەم بۆ لێی پرسیم چونکە هەڕەشەیان بەمن لێکردبوو تا بەزۆر دانپێدانانی پێ واژۆبکەن."

رزگار کۆچەر، هەولێر