سەردێڕ:

سەنتەری میترۆ: بەهۆی نوسینێکەوە سەرکۆماری عێراق نوسەرێکی خستە زیندان

فۆتۆ: 
2020-09-22

5558 جار خوێندراوەتەوە

رێکخەری سەنتەری میترۆ رایگەیاند، بەهۆی سكاڵایەكەوە، بەهرۆز جەعفەر نوسەری وتاری "تا كەی سەركۆمار ڕۆنگ ساید لێ دەخوڕێت؟"، کە لە هەمانکاتدا، سەرۆكی ئینستیتیوتی مێدیتریانە بۆ توێژینەوەی هەرێمایەتی و ئەندامی لقی كەركوكی سەندیكای رۆژنامەنوسانیشە، لەلایەن بنكەی پۆلیسی ئەزمەڕ لە شاری سلێمانی راگیراوە.

رەحمان غەریب، رێکخەری سەنتەری میترۆ رایگەیاند، کە لەكاتی سەردانی هاوڕێكانیدا، بەهرۆز جەعفەر پێیی راگەیاندوون، "پارێزەرێكی بەرهەم ئەحمەد ساڵحی سەركۆماری عێراق داواكەی جوڵاندووە و بۆ ماوەی ٨ رۆژیش راگیراوە."

دەشڵێت، "دۆسییەی رۆژنامەنوسان بەپێی  یاسای ژمارە (٣٥)ی ساڵی ٢٠٠٧، لە حاڵەتی ساغبوونەوەی تۆمەت بەسەر رۆژنامەنوسدا لەسەر كاری رۆژنامەوانی سزای دارایی (غەرامە)ی بەسەردا دەسەپێنرێت و دەستبەجێ رۆژنامەنوس ئازاد دەكرێت."

ئاماژەی بەوەشکرد، لە هەندێک حاڵەتدا، پەنا دەبرێتە بەر یاسای ژمارە (١١١)ی ساڵی ١٩٦٩، كە ماددەی(٤٣٣)ی یاساكە باس لە ناوزڕاندن دەكات یان پەنا دەبرێتە بەر ئەو بڕگە و ماددانەی باس لە ئاسایشی نەتەوەیی دەكەن.

باسی لەوەشکرد، لە حاڵەتی نوسینەكەی (بەهرۆز جەعفەر) پەنا براوە بۆ یاسای سزادانی عێراقی، كە سزاكانی توندترن.

رەحمان غەریب راشیگەیاند، سەنتەری میترۆ داوا دەكات سەركۆمار سنگی فراوان بێت لە بەردەم نوسین و تەنانەت بڵاوكردنەوەی هەندێ زانیاری پشتنەبەستوو بە سەرچاوەكانی سەرۆكایەتی كۆمار، چونكە دەرگای زانیاری هەموو كات ئاوەڵا نین بۆ نوسەران و رۆژنامەنوسان.

روونیشیکردووەتەوە، کە مافی هەر كەسێكە لەكاتێكدا هەستدەكات هەر نوسەر و رۆژنامەنوس و چالاكوانێك ناوی زڕاندووە و هەواڵی ناڕاستی لەبارەی كارەكانیەوە بڵاوكردووەتەوە، پەنا بۆ یاسا ببات، كە بەلای ئەوانەوە ئەو یاسایە یاسای رۆژنامەگەرییە نەك یاسایەكی تر.