سەردێڕ:

شارەوانی سلێمانی لەبارەی سوتاندنی سنەوبەرەكانی تاسڵوجە روونكردنەوە دەدات

فۆتۆ: 
2020-09-19

4937 جار خوێندراوەتەوە

شارەوانی سلێمانی رایگەیاند، شوێنی دار سنەوەبەرەکان ناکرێت بە هیچ پرۆژەیەک و بڵاوکردنەوەی ڤیدیۆی سوتاندنی دار سنەوبەرەکان کۆنە.

ئاكۆ عەلی جێگری سەرۆكی شارەوانی سلێمانی، لە كۆنفرانسێكی رۆژنامەنوسیدا رایگەیاند، "شوێنی دار سنەوەبەرەکان ناکرێت بە هیچ پرۆژەیەک" ، دەشڵێت، 'لە چەند رۆژی رابردوودا هیچ ئاگرێک لە دار سنەوبەرەکان نەکەوتووەتەوە".

ئاماژەی بەوەشكرد، "لە ٧ ی حوزەیرانی ئەمساڵدا ئاگرێک كەوتەوە و ئەو سنەوبەرانە لە رێگەی ئەو ئاگرەوە وشك بوون و سوتاون كە بەهۆی ئاگرێك بووە كە لەناو فەرماندەی كەوتووەتەوە و بەهۆی با فراوانبووە" .

هەروەها، سەرۆكی شارەوانی راپەرین لەو كۆنفرانسەدا رایگەیاند، "ئێمە دڵنیاتان دەكەینەوە ئەو شوێنە بۆ هیچ پڕۆژەیەک بەكارنەهاتووە و بەكاریش نایەت".

ئەوەش دوای ئەوەدێت، دوێنێ هەینی بەشێک لە سنەوبەرەكانی رێگەی تاسڵوجە لە سلێمانی ئاگری تێبەردرا و ئەوەش نیگەرانی دانیشتوانی شارەکە و رێكخراوەكانی بواری ژینگەی بەدوای خۆیدا هێنا.