سەردێڕ:

دەزگای ئاسایشی هەرێم دەستگیرکردنی شەش چەکداری لە سنوری چەمچەماڵ راگەیاند

فۆتۆ: 
2020-08-08

9075 جار خوێندراوەتەوە

دەزگای ئاسایشی هەرێم رایگەیاند، لە سنوری قەزای چەمچەماڵ شەش چەکداریان دەستگیرکردووە، کە ویستوویانە حەشارگەیەک دروستبکەن و پەیوەندی لەگەڵ چەند شانەیەکی نھێنی داعشدا دروستبکەن.

دەزگای ئاسایشی هەرێمی کوردستان لە راگەیەندراوێکدا بڵاویکردەوە، "ئەمڕۆ شەممە، ٨ ى ئابى ٢٠٢٠، لە سنوری قەزای چەمچەماڵ شەش چەکداریان دەستگیرکردووە، کە ویستوویانە حەشارگەیەک دروستبکەن و پەیوەندی دروستبکەن لەگەڵ چەند شانەیەکی نھێنی داعش"، دەشڵێن، "ئەو گروپە لە ساڵی ٢٠١٤ دا بەیعەتیان بە داعش داوە و چەکداربوون و بەشداربوون لە چەندین تاوانی دەرحەق بە مرۆڤایەتی."

ئاماژەبەوەشکراوە، "بەپێی زانیارییەکان تیرۆریستە دەستگیرکراوەکان لە خوارووی عێراقەوە ھەڵاتوون و لە سنورى چەمەچەماڵ بەناوی کارکردن و کرێکاری و ناسنامەی ساختەوە خۆیان حەشارداوە و لەچەند کێڵگەیەکدا کاری باخداریانکردووە."

ئەوەش هاتووە، "تاوانبارەکان ژمارەیان شەش کەسە و ناو و تەمەنیان بریتییە لە (ج .م) تەمەن ٢٦ ساڵ، (ئ .ھ ) تەمەن ٣٠ ساڵ، (م.ھ) تەمەن ٢٩ ساڵ،(ع.م) تەمەن ٣١ ساڵ و (ع.ع) تەمەنی ٢٢ ساڵ و (ع.د) تەمەن ٢٩ ساڵ، کە لەکاتی ئۆپەراسیۆنەکەدا یەکێک لە دەستگیرکراوەکان بەناوی (م.ھ) تەمەن ٢٩  ساڵ لەدەست ھێزەکانی ئاسایش هەڵهات و دواتر بە برینداری دەستگیرکرا."

ئەوەش خراوەتەڕوو، "ھێزەکانی ئۆپەراسیۆنی ئاسایشی سلێمانی بەھاوکاری بەڕێوبەرایەتی ئاسایشی رۆژئاوای سلێمانی ھەڵمەتی دەستگیرکردنی تیرۆریستانیان لە سنوری چەمچەماڵ دەستپێکردووە و لە چەند ئۆپەراسۆنێکدا رۆژی ٤ی ئابی ٢٠٢٠ تاوانبار (ج .م) تەمەن ٢٦ ساڵ و (ئ .ھ ) تەمەن ٣٠ ساڵ دەستگیرکرا کە ھەردووکیان خەڵکی فەلوجەن."

باس لەوەشکراوە، "لە رۆژی ٥ی ئابی ٢٠٢٠دا، هێزەکانی ئاسایش لە دوو ئۆپەراسیۆنی جیادا سێ " تیرۆریستی" دیکەیان لە سنوری بەردەقارەمان و ناو شاری چەمچەماڵ دەستگیکرد، کە پەیوەندیان بەھەمان گرووپەوە ھەبووە، ئەوانەی دەستگیرکراون ھەریەک لە تاوانباران (ع.م) تەمەن ٣١ ساڵ و (ع.ع) تەمەنی ٢٢ ساڵ کە خەڵکی مەحموودییەن و تاوانباری دووەم دوای ھەڵاتنی دەستگیکرا، ھەمان ئێوارەش لەناو شاری چەمچەماڵ "تیرۆریست (ع.د) تەمەن ٢٩ ساڵ خەڵکی بەغدا دەستگیراکرا، کە  لێکۆڵینەوە لەگەڵیاندا بەردەوامە و لە ئێستادا روبەڕوی یاسا و دادگا کراونەتەوە."