سەردێڕ:

چەند شارێک بەرزترین پلەی گەرمایان تۆمارکرد

فۆتۆ: 
2020-07-29

8041 جار خوێندراوەتەوە

دەستەى گشتیى كەشناسى و بومەلەرزەزانى عێراق رايگەياند، پلەی گەرمی شارەكانى بەغدا و هيت لە خۆرئاواى عێراق و بەدرە و عەلى غەرب لە كوت و عەمارە ٥٢ پلەى سەديان تۆمار كردوە .

شارى بەغدا و چەند پارێزگايەكى تر لە باشوری عێراق بەرزترين پلەى گەرمايان لە جيهاندا تۆمار كردوە، بەپێى زانياريەكانى دەستەی گشتیی کەشناسی و بومەلەرزەزانی عێراق، ئەوە بەرزترين پلەى گەرما بووە لە جيهاندا، لە رۆژی ٢٩ی تەمموزدا.

دەستەى گشتیى كەشناسى و بومەلەرزەزانى عێراق رايگەياند، پلەی گەرمی شارەكانى بەغدا و هيت لە خۆرئاواى عێراق و بەدرە و عەلى خۆرئاوا لە كوت و عەمارە ٥٢ پلەى سەديان تۆمار كردوە .

ئاماژەى بەوەداوە، فڕۆكەخانەى بەسرە ٥١ پلەى سەدى تۆمار كردووە و عەمارە و كەركوك و خورماتوو ٥٠ پلەيان تۆمار كردوە، بەڵام موسڵ ٤١ پلە بووە.

سەرەڕاى بەرزبوونەوەى پلەكانى گەرما بەو شێوە بەرچاوە، هاوڵاتيانى عێراق كێشەى کەمیی كارەبا و تەنانەت ئاويشيان هەيە، بەهۆى ئەوەشەوە خۆپيشاندانەكان لە چەند پارێزگايەك بۆ داواكارى خزمەتگوزارى دەستيان پێكردوەتەوە و لە ماوەی چەند رۆژی رابردوودا چەند خۆپیشاندەرێک کوژران و بریندار بوون.

لە وەرزی هاویندا لە نیوەگۆی باكووری زەوی، پلەكانی گەرما بەرز بۆتەوە و ماوەی رۆژیش درێژتر بووەتەوە، بەڵام لە ناوچەكانی باشووری رۆژئاوای ئاسیا بە گشتی و لە هەرێمی كوردستاندا بە تایبەتی، پلەكانی گەرما دەگاتە سەرووی ٥٠ پلەی سیلیزیی، كە ئەمەش بێ شك دەبێتە هۆی سەرهەڵدانی چەندین كێشە و گرفت، كە لە سەرووی هەموویانەوە، كێشەی تەندروستییە.

لە رووی پزیشكییشەوە بەرزبوونەوەی پلەی گەرمیی لەش و ئاڕەقكردنێكی زۆر لەسەرەتا و پاشانیش وەستانی لە ناكاودا، دەبێتە هۆی وشکبوونەوەی پێست.

هەروەها، شەپۆلی گەرما کاریگەری گەورەی لەسەر بەرهەمی تاک هەیە، لەبەرئەوەی بیرکردنەوەی سست دەکات و بیر و هۆش بەربڵاو دەکات و توانای سەرنجدان و وردبینی کەمدەبێتەوە .

شارەزایان باسیان لە دەرەنجامە خراپەکانی بەرزبوونەوەی پلەی گەرماییان کردوە لەسەر لەش کە کاریگەری دەبێتە سەر خێرابوونی لێدانی دڵ و خێرابوونی كرداری هەناسەدان، رشانەوە، گرژبوونەوەی ماسوولكەكان، گۆڕانی رەنگی پێست بۆ رەنگی سوور، تاریك داهاتنی رەنگی میز لەگەڵ هەڵچوونی كۆئەندامی دەماریی و دەركەوتنی نیشانە شڵەژان و سەرئێشە و سەرسوڕان و دڵەڕاوكێ و وڕێنەكردن و زۆرجاریش لەهۆشچوون.

لەبارەی بەرزبوونەوەی پلەکانی گەرماوە لە هەرێمی کوردستان، فازڵ ئیبراهیم بەڕێوەبەری گشتیی کەشناسی و بومەلەرزەزانی هەرێم بە ئێن ئاڕ تی راگەیاند، داوا لە هاوڵاتیان دەکەن ئەگەرچی پلەکانی گەرما نزمیش ببنەوە و بچنەوە باری ئاسایی، بەڵام هەر خۆیان بپارێزن و لەو کاتژمێرانەی دیارییان کردووە لە ١١ تاوەکو ٤ی دوانیوەڕۆ، بۆ کاری پێویست نەبێت نەچەنە دەرەوە.