سەردێڕ:

کازمی: کاتی هەڵبژاردنی پێشوەختە دیاریدەکەین

فۆتۆ: 
2020-07-27

4392 جار خوێندراوەتەوە

مستەفا کازمی رایگەیاند، بە زووترین کات کاتی هەڵبژاردنی پێشوەختە لە عێراق دیاریدەکەین و دەشڵێت، "هەر کەسێک ناڕەزایەتی بەرامبەر بە حکومەت هەیە، با چاوەڕێی هەڵبژاردنەکان بێت نەک حکومەت پەکبخات."

مستەفا کازمی سەرۆکوەزیرانی عێراق رایگەیاند، "کار بۆ هەڵبژاردنی پێشوەختە دەکەین و من سوورم لەسەر هەڵبژاردنی پێشوەختە، داواشمان لە سێ سەرۆکایەتییەکە کردووە کە ئاستەنگییەکان لە بەردەم ئەنجامدانی هەڵبژاردن لابدەن"، دەشڵێت، "هەر کەسێک ناڕەزایەتی بەرامبەر بە حکومەت هەیە، با چاوەڕێی هەڵبژاردنەکان بێت نەک حکومەت پەکبخات."

ئەوەشی خستووەتەڕوو، "ئاواتەخواز بووم چارەسەرێکی جادوییمان هەبوایە، بەڵام بەداخەوە چەند ساڵێکی زۆر لە تێکدان و گەندەڵی و خراپ بەڕێوەبردن، لە شەو و رۆژێکدا چارەسەر ناکرێت، دادپەروەری نییە داوا لە حکومەتێک بکەین کە تەمەنی دوو مانگە، باجی ئەو تاڵانکردنانە بدات کە حکومەتەکانی پێشوو ئەنجامیانداوە".

ئاماژەی بەوەشكردووە، "لێکۆڵینەوە لە رووداوەکەی ڕۆژی رابردووی گۆڕەپانی تەحریر دەستیپێکردووە و داواشمان کردووە لە ماوەی ٧٢ کاتژمێردا ئەنجامی لێکۆڵینەوەکانمان بەدەستبگات و هێزە ئەمنییەکان رێگەپێدراو نین تەقە لە خۆپیشاندەران بکەن."

ئەوەش لە کاتێکدایە، لەسەرەتای دەستبەکاربوونیەوە وەک سەرۆکوەزیرانی نوێی عێراق، مستەفا کازمی هەوڵی چاکسازی دەدات و تا ئێستاش چەندین پۆستی گرنگی گۆڕیوە و کەسانی دیکەی لە شوێن داناون، هاوکات ١٤ دەروازی سنوریشی کۆنترۆڵکردووەتەوە.