سەردێڕ:

لە دیالە دەستبەسەر چەند چەک و تەقەمەنییەکدا گیرا

فۆتۆ: 
2020-07-25

2214 جار خوێندراوەتەوە

لە میانی ئۆپەراسیۆنێكی هێزەكانی سوپای عێراقدا لە سنوری باكوری پارێزگای دیالە، دەستبەسەر ژمارەیەك چەكی قورس و بڕێك تەقەمەنیدا گیرا.

وەزارەتی بەرگریی عێراق لە هەژماری تایبەتی خۆی لە تۆڕی كۆمەڵایەتی تویتەر بڵاویكردەوە، هێزەكانی فیرقەی پێنجی پیادە، ئۆپەراسیۆنێكی گەڕان و پێشكنینیان لە بێستانەكانی حەوزی سنسل و گوندەكانی حنبس، عالی و ئەسیود باكوری میقدادییە سەر بە پارێزگای دیالە ئەنجامداوە.

ئاماژەی بەوەشکردووە، لە میانی ئۆپەراسیۆنەكەدا، سێ موشەكی ئاربیجی، ١٥ گولـلە هاوەن و دوو بۆمبی چێنراو دۆزراونەتەوە و دەستیان بەسەرداگیراوە.

وەزارەتی بەرگریی عێراق راشیگەیاندووە، دواتر چەک و تەقەمەنییەكان لەلایەن تیمی پووچەڵكردنەوەی بۆمب، پووچەڵكراونەتەوە.

ماوەیەکە رێکخراوی داعش هەوڵی زیندووکردنەوەی شانەکانی دەدات لە چەند ناوچەیەکی جیاوازی عێراق و بەوهۆیەشەوە لە مانگی شوباتی ئەمساڵەوە ئۆپەراسیۆنی بەردەوامی دژ بە داعش لە عێراق بەڕێوەدەچێت.