سەردێڕ:

سەردانی مستەفا کازمی بۆ سعودیە دواخرا

فۆتۆ: 
2020-07-20

7704 جار خوێندراوەتەوە

وەزارەتی دەرەوەی سعودیە رایگەیاند، دوای رێککەوتنی نێوان سعودییە و عێراق، سەردانی سەرۆک وەزیرانی عێراق بۆ سعودیە دواخراوە، بەهۆی نەخۆشکەوتنی شای سعودیەوە. 

سەرلەبەیانی ئەمڕۆ، دیوانی پاشای سعودیە راگەیاندراوێکی بڵاویکردەوە و تیایدا هاتووە، "سەلمان بن عەبدولعەزیز شای سعودیە، دوای ئەوەی توشی هەوکردن بووە لە زراویدا گواستراوەتەوە بۆ نەخۆشخانە تاوەکو چەند پشکنینێکی بۆ بکرێت." 

هاوکات، کەناڵی ئەلعەرەبییە لە زاری فەیسەڵ بن فەرحان وەزیری دەرەوەی سعودیەوە بڵاویکردەوە، "لەگەڵ برایانمان لە عێراق رێککەوتووین بەوەی، سەردانی سەرۆک وەزیرانی عێراق، تاوەکو هاتنە دەرەوەی شای سعودیە لە نەخۆشخانە دوابخرێت."

بڕیاربوو ئەمڕۆ دووشەممە، مستەفا کازمی سەرۆک وەزیرانی عێراق، سەردانی سعودیە بکات و لە سەردانەکەدا چەند رێککەوتنێک لە بوارەکانی ئابوری و سیاسی واژۆ بکات.

مانگی رابردوو، وەزارەتی دەرەوەی عێراق رایگەیاند، سەرۆک وەزیرانی عێراق لە مانگی تەمموزدا سەردانی ئەمریکا و ئێران و چەند وڵاتێکی دیکە دەکات و لەگەڵ کاربەدەستانی ئەو وڵاتانەدا کۆدەبێتەوە.