سەردێڕ:

لە تەقینەوەی دوو بۆمبدا سێ چەکداری حەشدی شەعبی لە دیالە کوژران

فۆتۆ: 
2020-07-11

2517 جار خوێندراوەتەوە

لە ئاکامی تەقینەوەی دوو بۆمبی چێنراو بە هێزێکی حەشدی شەعبی و هێزێکی دەزگای دژە تیرۆر، سێ چەکداری حەشدی شەعبی کوژران و پێنج چەکداری دیکە و دوو کارمەندی هێزەکانی دژە تیرۆریش برینداربوون.

شانەی راگەیاندنی ئەمنی سەر بە وەزارەتی بەرگریی عێراق رایگەیاند، لە میانی قۆناغی چوارەمی ئۆپەراسیۆنی پاڵەوانەكانی عێراقدا، بۆمبێکی چێنراو بە کاروانێکی لیوای ١٦ی حەشدی شەعبی لە رۆژئاوای دەریاچەی حەمرین تەقییەوە، لە ئەنجامدا سێ چەکداری حەشدی شەعبی کوژران و پێنجی دیکە برینداربوون، هاوکات زیانی ماددی بەر دوو ئۆتۆمبێلی ئەو هێزە کەوتووە.

ئاماژە بەوەشکراوە، بۆمبێکی دیکە بە هێزێکی سەر بە دەزگای دژە تیرۆر لە ناوچەی ئیمام شێخ بابە لە چوارچێوەی سنوری فەرماندەیی ئۆپەراسیۆنەکانی دیالە تەقیوەتەوە و بەهۆیەوە دوو کارمەندی هێزەکانی دژە تیرۆر برینداربوون و زیانی ماددی بەر ئۆتۆمبێلێکی سەر بەو هێزە کەوتووە.

بەیانی ئەمڕۆ شەممە، قۆناغی چوارەمی ئۆپەراسیۆنی پاڵەوانەكانی عێراق بە ئامانجی ریشەكێشكردن و راوەدوونانی چەکدارانی داعش لە چوار میحوەری سنوری پارێزگای دیالە دەستیپێكرا كە هێزەكانی فەوجی دژەتیرۆری سلێمانی تیایدا بەشداری دەكەن.

لە ماوەكانی رابردووشدا، قۆناغی دووەم و سێیەمی ئۆپەراسیۆنی پاڵەوانەكانی عێراق لە رۆژهەڵاتی سەڵاحەدین، رۆژئاوای دیالە و باشوری رۆژئاوای كەركوک ئەنجامدرابوون كە لە میانیدا، ژمارەیەك چەکداری داعش كوژران و ژمارەیەك حەشارگەی ئەو چەکدارانەش لە ناوچەكەدا خاپووركران.