شاهێ درەوین!

2064 جار خوێندراوەتەوە

ل تەمەنێ گەنجاتیێ، ئینسان گەلەک کارێن نەڕەواو کرێت دکەت، ئەڤ یەک بابەتەکە ژ سرۆشتێ ئینسانایە، بۆ ڤی تەمەنێ گەنجاتیێ، مرۆڤ یێ ب هیڤیە جارەکێ ئەڤ گەنجە ل خوە بزڤڕیت وشاشیێن خوە ڕاستڤەکەت و داخازا لێبورینێ ژ هەڤال و کەس و کارو نەتەوا خوە و خودایێ خوە بکەت، داخازا لێبورینێ دبیتە جوانترین سیفەتێن مرۆڤا، ئینسان چەند کارێن کرێت بکەت، لێ هەر دەما داخازا لێبورینێ کرو پەشیمانی ئەوان کارێن خراب بوو، هەمی خرابیەکا وی دێ د زێهنیەتا دەوروبەرێن ویدا هێنە ژێبرن و ژبیرکرن و دێ لبەر لێبۆرینا خەلکێ خوە کەڤیت و خودایێ مەزن ژی دێ لێبۆرینا وی قەبۆڵ کەت، لێ ئەوا نە خودێ تەعالا و نە مرۆڤایەتی لێنەبۆریت ئەوە کەسەک خراب کارو درەوین و زوردار بیت، حەتا تەمەنێ وی هەیە بەردەوام بیت و ژیێ وی ب داوی ژیبێت هەر یێ بەردەوام لسەر درەوێن خوە، شەرم ژ خوەو تەمەنێ خوە ژی نەکەت، یا ژ وێ شەرمزارتر بۆ ئەڤان تۆخمە مرۆڤا ئەوە، خەڵک سۆرو سۆر بزانیت ئەڤ پیرە کاڵە هەر ژ تەمەنێ خوە یێ زارۆکینی و گەنجاتی و تا نهاژی کەسەکێ درەوین و زاڵم بویە، دبێژنە ئەڤان تۆخمە مرۆڤێن بێ شەرم(سقوط) نابێژنێ (ساقط)چۆنکە( ساقطی) هیڤیا لێزڤڕینێ و شەرم ژ خوە کرنێ یا هەی! بەلێ (سقوط) یێ ژ هێڤی و ئەمەلی، خلاس بووی! بێ هیڤیاتیێ داوی یا ب ژیانا وی ئینای.

ئێک ژ ئەوان جۆرێن مرۆڤا ئەوێن خودێ تەعالا ل ڕۆژا داویێ لێنەبۆریت و تەماشەی ناڤچاڤێن وی ژی نەکەت ئەو جۆرە کەسەیە یێ ب سەرکردەو و سەرۆک و باشاو پێشەوا تێتە نیاسین و ئەو جۆرە مرۆڤە، مرۆڤەکێ درەوکەر بیت و ژیانا خوە ب درەوا دەست پێکربیت و ژیانا خوە ب درەوکرنێ ب داوی ئینابیت و نە شەرمێ ژ ژیێ خوە یێ پیر بکەت و نە شەرمێ ژ مەنسەب و پلەو پۆست و ناڤێ خوە بکەت، ئەڤ جۆرە مرۆڤە ل دەف ئینسانان ب نەفرەتی تێنە هەژمارتن و ل دەف خودێ تەعالا ژی مەلعونن.

پرسیار ژ پێغەمبەری سڵاڤ لێبن هاتە کرن گۆت: بسلمان هەیە، ترسنۆک بیت؟ پێغەمبەری گۆتێ بەلێ، گۆتێ: بسلمان هەیە قەلس و تەماع بیت؟ گۆتێ بەلێ! پرسیارا سیێ گۆت: یارەسول الله بسلمان هەیە(درەوین)بیت؟ پێغەمبەری گۆت: نەخێر، ئانکۆ کەسێ درەوین قەد ب بسلمان نا هێتە هەژمارتن! نەخاسم ئەو کەسێ حەفتێ هەشتێ ساڵێن ژیێ خوە ب درەو درەوکرنێ دەربازکربن و یێ بەردەوام لسەر درەوێن خوەو خەلک سۆر و سۆر دزانیت کەسەکێ درەوینەو هیچ جارەکێ ئاخافتن و کارو کریارێن وی وەکۆ یەک نەبویەو ب کەسەکێ درەوین هاتیە نیاسین و پیرە کالەکێ درەوین و درەوکەرێ مێژویێ هاتیە ل قەلەمدان.

پێغەمبەر سڵاڤ لێبن دبێژیت بەس درەوێ نەکە، چ گۆنەهەکا دی تۆ بکەی بکە!

هەوار بو وی سەرۆک و ڕێبەرێ ب درەوێ دەست ب ژیان و خەباتێ کری و ب درەوێ داوی ب تێکۆشان و خەبات و ژیێ خوە یێ پیس تینیت!