کوردستان؛ وەلاتێ سەیر و سەمەرا

2776 جار خوێندراوەتەوە

سەیر نینە: عەقلەکێ پێکهاتی ژ تولڤەکرن و ئاغاتی و عەسکەر تاری و موخابەراتیێ ، شێرێن وەڵاتی ، بێی هەبوونا هیچ تاوانەکێ ، مینا "شێروان شێروانی" زیندانی بکەت .

سەیر نینە: سەروکەك هەتا سەر هەستی شکەستنێ

د ماوەیێ چوار ساڵێن سەروکاتیا خوە دا بینیت. و دهەمان دەم دا خوە ب خوڕاگر و خودان دەستکەفت ل قەلەم بدەت .!

سەیر نینە: کوڕ و کچێن سەروکی خودان زانکویێن تایبەت بن! و دهەمان دەم دا ئێکەمێن سەر ئاستێ زانکویێ بن!! ، لێ خودان باوەرنامەیێن بەکەلوریا و ماستەر و دکتورایێ ، چایچی و کرێکار بن، و هندەک جاران کرێکاری ژی بدەست وان نەکەڤیت.

سەیر نینە: بنەماڵەیەك نیڤا خاکا وەڵاتی بفروشیت داگیر کەرا و نوکەریێ ژ بۆ دوژمنی بکەت ، لێ دهەمان دەم دا ، خوە ب پارێزەر و ڕزگارکەرێ وەڵاتی بزانیت و

ئەڤێ درەوا هندە مەزن ژی ژ خوە باوەربکەت .!!

سەیر نینە: دەستهەڵاتەکێ هندە جورئەت نەبیت تەنانەت ب بەیاننامەیەکێ ژی پڕوتستویا پێشێلکاری و داگیرکاری و بومبەباران و بەزاندنا سنورێن خوە بکەت دژی دوژمن و دەولەتێن داگیرکەر . چاڤ و گوهێن خوە شوڕ بکەت ، لێ ژ بۆ مللەتێ خوە گورگێ دەڤ بخوین بیت. و چاڤ و گوهـ و زمانێ مللەتی ژ دیتن و بهیستن و گوتنا ڕاستی و ئازادیێ بگریت .

سەیر نینە: دەستهەڵاتەك بانگا دیموکراسیێ بکەت،

ب بەژن و باڵا ژ هەڤجوداکرنا هەر سێ دەستهەڵاتێن یاسا دانان - جێبەجێکرن - دادوەری٫ یێ بێژیت و دهەمان دەم دا، هەمی جومگێن دەستهەڵاتێ ددەست ئێک کەس یان چەند کەسەك یان بنەماڵەیەکێ دا بن .

سەیر نینە : دەستهەڵاتا کوردستانێ ئیدیعایا سیستەم و موئەسەساتی کرنا دام و دەزگەهێن وەڵاتی بکەت ، و دهەمان دەم دا کلیلا سەرجەم دام و دەزگەها ددەستێ کەسەکێ دابیت ، هەر چ گاڤا حەزبکەت ڤەکەت یان ژی دائێخیت .

سەیر نینە : دەستهەڵاتەک ژ ئەگەرێ دزیکەر و دزیێن خوە یێن مەزن و بێ هەژمار ، ب ملیارێن دوڵارا قەردار ببیت و دبەرامبەر دا باج و سەرانەیان لسەر مللەتێ خوە ، لێکدانی سەد ، و دوو سەد ، و سێ سەدێ بکەت.

نەخێر سەیر نینە : ئازادیا ڕادەربڕینێ و ئازادیا ڕوژنامەڤانی دبن صفرێ دا بیت ، خەلکەك لسەر لایك و پوست و ڤیدیو ، و لێدوانێن ڕوژنامەڤانی بهێتە گرتن و ڕەڤاندن و و زیندان کرن و قوتان و تیرورکرن ، ژ ڵایێ جەستەیی و کەساتی ڤە . لێ دبەرامبەر دا "سعید صەحاف"ێن کورد : ئیدیعایا هەبوون و بەرجەستەکرنا تمام یا ئازادیا ڕادەربڕینێ بکەن.

سەیر نینە : نەفت و گاز و غاز د وەڵاتی دا ژ ئاڤێ پتر بیت و ل جهێ ببیتە خوەش گوزەرانی بۆ مللەتی ، بەروڤاژی مللەت ب ملیارێن دوڵارا بهێتە قەردار کرن ، و لبەر گەرما هاڤینێ بیت و لبن ڕەحما سڕ و سەقەما زڤستانێ بیت.!

باوەربکەن سەیر نینە : کەڤنە بەعسی و جاش و خاك فروش و وەڵات فروش ل جهێ ڕاپێچی دادگەهەکا دادپەروەرانە بهێنە کرن و بگەهن سزایێ خوە ، بەروڤاژی د های ڵایڤێ دا ل نیڤا هەولێرێ بژین ! ، خودان شقە و ڤللە و مەزرەعە و جی کڵاس و ژیانەکا شاهانە بن، لێ پێشمەرگە و زیندانیێن سیاسی و خەباتکەر و شوڕەشگێرێن کوردینیێ ، چل ڕوژ و پێنجی ڕوژا چاڤەڕێی بە پەلە و مزگینیێن هاتنا نیڤ موچە و چارێک موچەیێن خوە بن.

سەیر نینە : وەڵات بۆ ئەرک و پێگیریا لسەر مللەتی مینا ئەوڕوپا بیت! و ژ بۆ ماف و ئازادیێ ئەفریقا بیت .

ئەڤە هەمی و هێشتا و هێشتا سەیر نینە ، لەوا شێروان شێروانی لسەر یەك پەنجەمور پشتی سێ ساڵێن زیندانکرنێ ب زوڵم و ستەم، جارەکا دی بۆ ماوێ چوار ساڵان هاتە حوکم کرن و زیندانکرن .

لێ ژبیر نەکەن ئەگەر ئەڤ هەمی تاوان و پێشلکاری و زوڵم و ستەمە سەیر نەبن ، دڵنیابن ڕوخان و ژناڤچوون و نەمانا ڤێ دەستهەڵاتا خوە سەپێنەر ژی بتنێ د ماوێ ئێک شەڤ و ڕوژ دا سەیر نینە و سەیر نابیت .

جاسم هاشم

چاڵاکڤانێ سیاسی