کی نابێژیت ئەم یێ د مرین و ئەڤە جەهەننەما مەبیت؟

3844 جار خوێندراوەتەوە

قەدەرا مللەتێ کورد بێ قەدرە، ب دەهان و ب سەدان ساڵا گەلێ کورد لبەر خوەداو شۆڕەش کرن و د ناڤا ئاسن و ئاگریدا، مەشیان و سەرێ خوە نە چەمان و ب ڕشتنا خۆهـ خۆینا خوە ئۆمێدا شینبوون و بشکۆژا گۆل و نێرگزا د ناخ دا هەبوو.

ئاخا وان دلێ وان بوو، ل داویێ پارچەک ژ وی دلی د ناڤا قەفەسا سینگێ خوەدا مۆکم کرو ئەو پارچە عەرد مینا بەڕکەکێ ژبن پەستەڵێن پیسێن بەعسا فاشت ڕاکێشا!

لێ هزار جار ب مخابنیڤە،ئەو تبلێن د دەمێ شۆڕەشێ دا لۆلەپکێن تڤەنگا د شەقاند،نها ئەو تبل یێ تێنە گەز تن و لەقدان و قێڕیێن پەشیمانیێ عەرشێ خودێ د هەژینن و خۆزیا زۆحاک و قڕالێ بەغدایێ د خازن!

وەی پا حەیفەک مەزنە ڕیسێ مە بۆیە خۆری و خۆزیا مە بویە دەستهەڵاتا دەڤ بخۆینەکی!

قەدەرا گەلێ مە کەفتە دەستێن بێ قەدرو نەزان و نەڤاماندا، ئاگرێ مە ژ دەهمەنا مە بەربوو مە، ئێدی ڤەمراندنا ئاگرێ دەهمەنێ یا بساناهی نابیت.

خودانێن ڕاستەقینەیێن شۆڕەشێ تبلێن خوە د گەزن، ساڤایێن سەرهلدانێ ژی نها بەشیمانێن وێ ڕۆژێنە ئەو ڕۆژا ئێکەم پێنگاڤ بەرەف خوەندنگەهێ چووین و هزاران تفا ل حەرەما زانکۆ و پەیمانگەهان د بارینن.

قەدەرا د کەڤیتە پێشیا مە، یان ئاڤە، یان ئاگرو گۆڕی، هەلبەستڤانێ مەزن شێرو بێکەس دبێژیت(ئەڤە ئاگر هەی ئەم یێ د شەوتین... ئەڤە ئاڤ هەی ئەم یێ د خەندقین) ژیان یا لمە بویە ژان، هزرەت یا بویە ژین و نان!

تاڵانچی و خۆسەپێنەرو دکتاتۆرو زۆردارو خۆین ڤەخارێن خۆمالی سینگێ هزاران گەنجا دایە، پێلێن ڕەشێن دەریایێن بێ دلۆڤان و سەدان گەنجێن خێر نەدیتی، بونە خارنا قرش و ماسیا، هزاران کەس بونە خۆلام و خدامێن بیانیاو هزاران کەس ژی، چاڤەڕێی قەدەرەکا نە دیارن و یێت بوینە ئالاڤەکێ قۆمارا سیاسی و بازرگانی د دەستێن بیانیادا.

بیانیا گەنجێن کورد یێت کرین پیلێن دۆمینێ و شەش و بێشا پێ قەید دکەن و پێکێن ویسکیێ د بەڕا د نووشن و لیق لیق ب جوانیا مە د کەنن و کەربێن وان ژ هەبوون و ژ دایک بوونا مە ڤەدبن.

ڕاستە ئەوان بەهشتەک یا چێکری و پێت مە یێت کەفتینە ناڤا بەهشتا وان، لێ ئەو ب دەرخستنا یاسایێن خوە وێ بەهشتێ لمە د کەنە جەهننەم و ئەم یێت بوینە مێهڤانێن ب کۆتەکی و ل هەمبەر تێکچوونا ئەنیا خودانێ مالێ و شەڕێ ژن و مێرێن خودانێن مالێ دەرسەک وازحە ئەم تێبگەهین کۆ ئەو نەڕازینە ژ مێهڤانداریا مەو ئەم بوینە مێهڤانێن شەرمنوک و ژ شەمێن خوەدا، پاریێ نانی د قڕکا مەدا ناچیتە خار.

ئێدی ئەم نە ڕامانا مرنێ دزانین و نە مرنێ دنیاسین، ما کەسێ ژیان نەدیتی دێ چ ژ ڕامانا مرنێ فام کەت؟!

ڕەڤین ژ پەنج و کێلبێن خۆیانیاو کاردنا ناڤا شیرها ئەژدەهاو مارێن بیانیا!!

دبێژم ئیدی مە بەهرا خوە ژ جەهەننەمێ وەرگرت و ل ڕۆژا داویێ ژی دێ بێژمە خودێ ئەز بەهرا گۆنەهێن خوە د جەهەننەمێ دا یێ شەوتیم، نها دەم هات تۆ بەهرا من ژ بەهشتێ ب دەیە من.