بڕیارا دادگەها فەرەنسی و ڕاگەهاندنا وەزارەتا سامانێن سروشتی یێن هەرێمێ

14464 جار خوێندراوەتەوە

بۆ دەمێ چەندین سالانە حکومەتا هەرێما کوردستانێ بناڤێ ئابوریێ سەربەخو هەر چ نیعمەتێن سەر ئەرد و بن ئەردێن ڤی وەلاتی ب ڕێکا وەلاتێ تورکیا ب سەربەخو و جودا ژ حکومەتا ناڤەندی د فروشیت و هەتا نها خەلک بەردەوام د قەیرانێن ئێک لدیڤ ئێکدا دنالیت و ئەڤ مللەتە ب چەندین ملیار دۆلاران دەیندار کر.

هەردەم هێجەتا ڤێ حکومەتێ و بەرپرسێن وێ ئەو بوویە کو رادەستکرنا پەتڕۆلا ڤی وەلاتی ب حکومەتا ناڤەندی ژناڤچوونا ڤی قەوارەیە و شایستێن دارایی یێن مللەتی ژ ئالیێ حکومەتا ناڤەندی ڤە ناهێنە دان، بهانەیەکا وەسا کو تەماما مللەتی ب نەزان دزانن ژبەرکو بەری راگەهاندنا ئابوریێ سەربەخۆ خەلک ژ نها باشتر دژیا و رەوشا ژیانا وان باشتر بوو.

لێ پشتی راگەهاندنا ئابوریێ سەربەخۆ و هنارتنا پەتڕۆلا ڤی مللەتی ب ڕێکا وەلاتێ تورکیا بۆ بازارێن جیهانێ ناکوکیێن هەردوو حکومەتان بەردەوام بوون و ئەو ئالیێ کارتێکرن لێ کری د ناڤ ڤان ناکوکیان دا خەلکێ هەرێما کوردستانێ بوو، کو چەندین جاران هەر ڤی خەلکی داخاز ژ حکومەتا هەرێمێ کریە کو ب ڕێکا حکومەتا ناڤەندی سامانێ ڤی وەلاتی بفروشن بڤێ رێکێ بۆ رەوشا ژیانا وان باشترە، لێ هێجەتا حکومەتا هەرێمێ بو خەلکی ئەو بویە کو رادەستکرنا سامانێ وەلاتی ب حکومەتا ناڤەندی دێ بیتە سەدەمێ ژناڤبرنا قەوارەیا ڤی وەلاتی، زور جاران ژی کەسێن ئەڤ داخازیە کری ب خۆفروش و جاش هاتیە بناڤکرن.

لێ پشتی بریارا دادگەها فەرەنسی د بەرژەوەندیا حکومەتا ناڤەندیدا ئێکلایی بووی و بڕیار هاتیەدان کو حکومەتا هەرێمێ ب ڕێکا تورکیا نەشێت سامانێ ڤی وەلاتی بفروشیت نها ڕاگەهاندنەک بەلاڤکریە و دبێژیت بڕیارا دادگەها فەرەنسی نەشێت ببیتە سەدەمێ ژناڤبرنا پەیوەندیێن وان و حکومەتا ناڤەندیا عێراقێ و ئەم گەهشتینە رێکەفتنێن سەرەتایی، ئەڤ ڕاگەهاندنە وێیەکێ دیاردکەت کو تاکە ئالیێ د ئابوریێ سەربەخویێ هەرێمێ دا کارتێکرن لسەر بووی و زیان ڤێ کەفتی بتنێ خەلکێ هەرێمێ بوویە و هەر تاکەکێ ڤی وەلاتی ب ڕێکا وی ئابوریێ سەربەخو قەردار بوویە.