سەرنووچە:

پشتی ٣٢ سالان، ئەمریکا جووت حزبان ژ بن سیبەرا خۆ دەردئێخیت

PM:08:31:04/02/2023
6344 جار خوێندراوەتەوە
ئومێد بەرۆشکی
+ -

ـ خەلاتێ وەزارەتا دەرڤەیا ئەمریکا بۆ پارێزەرێن کەیسا بەهدینان

ـ هۆشداریێن مەکگۆرك

ـ پەیامێن پلاسخارت

هەر چەند ئەڤ سێ خالێن لسەری من نڤیسین، گرنگە هەر ئێــك ببنە هێڤێنی گۆتارەکێ و بهێنە ڤەخاندن و شرۆڤەکرن لێ دخۆازم هەر سێیان دیەك گۆتاردا کۆمڤە بکەم دڤەخاندنا خۆ دا ژبەرکو پێکڤە گرێدانا وان ژی دگەل ئێك هەیە.

وەڵاتێ ئەمەریکا ب شێوەیێ ڕاستەوخۆ یان نەڕاستەوخۆ هەردەم باندۆر لسەر بڕیار و پرسێن چارەنڤیسیێن عیراقێ هەبوویە دناڤدا هەرێما کوردستانێ دا، هەتا بگرە دروستبوونا هێلا ٣٦ــا سنوریا دناڤبەرا پارێزگەهێن کوردی و عەرەبیێن عیراقێ ب بزاڤێن ئەمەریکا و هەڤاڵبەندێن وێ بووینە ل جڤاتا ئاسایشا ناڤ دەولەتی و پاشان دەرکرنا بڕیارا ٦٨٧ بۆ دانپێدان ب ئیدارەدانا ئەڤان دەڤەران ژلایێ کوردان بخۆڤە.

ئەمەریکا هەردەم عیراقەکا یەکگرتیا فیدڕالی ڤیایە، و نەخۆاستیە ژدەرڤەی ئەڤێ سیاسەتێ کەس پێنگاڤان بهاڤێژیت و یێ بهاڤێژیت دێ باجێ دەت، دگەل ڤێ چەندێ ژی ئەمەریکا هەرێما کوردستانێ نەك ب هەڤاڵبەندا خۆ دزانیت بەلکو ب مۆلکێ خۆ دزانیت دناڤا عیراقێ دا، لەوان سیاسەتکرن لڤێ هەرێمێ ژدەرڤەی هێلا ئەمەریکی بێگۆمان دێ کارڤەدان هەبیت، نەخاسم ئەگەر ئەو لادان ستراتیژی بن و بگەهنە بابەتێن بوونە پاشکویێن وەڵاتەك دن وەك تورکیا و ئیران، کو دنهادا دابەشبوونا جووت حزبێن دەستهەڵاتدار ل باکور و باشورێ هەرێمێ بسەر تورکیا و ئیرانێ دا، لادانەکا زەقە ژ هێلا ئەمەریکی.

هەلبەت بۆ پاراستنا ئەڤێ مۆلکێ خۆ ئەمەریکا دێ هەر تشتی کەت و لادانا لایەنەکی بۆ بزەحمەت نینە، بەلێ ئەمەریکا پشۆدرێژە و ب پەیام و چەند لڤینان ل پێشیێ بەرامبەری خۆ هایدار دکەت، یەکەم هۆشداریا وەرچەرخانێ ژلایێ پلاسخارت نۆینەرا نەتەوەیێن یەکگرتی ل عیراقێ بوو کو هەمان جێبەجێکارا هێلا ئەمەریکیە ل عیراقێ.

پارتا دەستهەڵاتدار یاریەکا ب مەتڕسی دکەت، ژ پێناڤ ئابوور و بازرگانیا خۆ دخازیت لسەر هەردوو هێلێن جەمسەرێن ڕوسی و ئەمەریکی کاربکەت، تایبەت پشتی بوویەرێن ڕیفڕاندۆمێ، هەلبەت ئەڤێ چەندێ ژی ئەمەریکا تۆڕە کریە، تایبەت دەما نێچیرڤان بارزانی سەرۆکێ وی دەمیێ حکومەتا هەرێما کوردستانێ و سەرۆکێ نهایێ دەم بسەرڤەچوویێ هەرێمێ ل کافیەکێ ل دەما ڕێستەکێ وێنەیەك دگەل ڤلادیمێر پۆتین سەرۆکێ رۆسیا بەڵاڤ کری.

ئەمەریکا ئەڤ هەرێمە دناڤا عیراقێ دا دروستکریە نە بۆ بەڕژەوەندی و خۆشڤیانا کوردان و بنەمالێن دەستهەڵاتدار، بەلکو دروستکریە ژبۆ دڤێ مەیدانێ دا هەبوونا خۆ د عێراقێ دا بهێلیت لهەمبەر لڤینێن ئیرانێ، بەلێ دەما پارتێن دەستهەڵاتدار بەرەڤ هێلا ڕوسی ڤە دچن هەلبەت ئەمەریکا ب بێدەنگی نامینیت و ئەڤی مولك و هێلا بۆ بەژنا خۆ داڕژتی پێشکێشی تورکیا یان ڕوسیا بکەت .

ئەمەریکا دخۆازیت ل هەرێما کوردستانێ چ بهێتە کرن ژبۆ کو دەستهەڵاتداریا نها لژێر سیبەرا پاراستنا خۆ لانەدەت؟

ب ئاشکەرای ئەمریکا و هەڤاڵبەندێن خۆ ب ڕایەدارێن کوردستانێ ڕا گەهاندیە پێدڤیە چاکسازیێن بنگەهین ل هەرێمێ بهێنە کرن دهەموو بیاڤان دا ئەگەر نە ئێدی هوون لبن سیبەرا پاراستنا مە نابن، دیارترین بنەمایێن هێلا سیاسەتا ئەمەریکێ ل هەرێمێ :

ـ خۆ دوویرئێخستن ژ پاشکووبوون بۆ تورکیا و ئیرانێ.

ـ رێیا وە یا پێشیێ بەغدا بیت .

ـ ئێکخستنا هێزێن لەشکەری ( پێشمەرگە، ئاسایش و هەواڵگری).

ـ شەفافیەت دداهات و ڕێڤەبرنێ دا .

ـ ب دامەزراوەیکرنا هەرێمێ و دوویرکەفتن ژ دەستهەڵاتا خێلەی.

ـ بەرفرەهکرنا بازنەیا ئازادیێن گشتی .

ـ هەرێم ب بەردەوامی جێبەجێکارا سیاسەتا ئەمەریکی بیت بێ لادان.

جووت حزبێن دەستهەڵاتدار ل هەرێما کوردستانێ نەبتنێ پێگیرنەبوون ب هێلا ئەمەریکی بەلکو بن پێکاریێن مەزن ژی ئەمجام داینە :

ـ هەولێر، دهۆك، زاخۆ و سۆڕان وەك ناڤەندەك بۆ چاڵاکیێن سیاسی، هەواڵگری و بازرگانیێن تورکیا .

سلێمانی، هەڵەبجە و گەرمیان وەك ناڤەندەك بۆ چاڵاکیێن سیاسی، هەواڵگری و بازرگانیێن ئیرانێ .

ـ دوویرکەفتن و ڕێکنەکەفتن دگەل بەغدا و دانانا ئەنقەرە و تەهڕان ل پێشیا بەغدا بۆ هەولێرێ .

ـ ئێکنەخستنا هێزێن لەشکەری و بەرۆڤاژی زەقبوونا ململانێن لەشکەری دناڤبەرا جووت حزبان دا .

ـ رۆژ ب رۆژ تاڵانی و نەشەفافیەت دزێدەبوونێ دایە، و ژیارا وەڵاتیان بەرەڤ خرابترینە .

ـ زاڵبوونا حزبی و خێلەی بسەر حکومەت و سیستەمێ دادوەری دا.

ـ بەڕتەنگکرنا بازنەیا ئازادیێن گشتی، و ڕێگریکرن ل میدیا ئازاد و خرڤەبۆنان، دیارترین کەیس (گرتیێن بەهدینان).

ـ پارتا دەستهەڵاتدار یا ئەمەریکا خۆاستی ئەنجام نەدایە بەلکو بەردەوام دخازیت هەردوو بەرەیێن ڕوسی و ئەمەریکی ژخۆ ڕازی بکەت ژپێناڤ ئابوورا خۆ.

پشتی هەمی ئەڤێ لادانا ل سیاسەتا هێلا زلهێزەکا وەکو ئەمریکا ژلایێ جووت حزبێن پاشکویێن دۆژمنێن خۆ ڤە دناڤا هەرێمەکا نقوومبووی ژ گەندەڵیێ و دناڤا وەڵاتەکێ لاواز و ئێخسیرا دەستێن هەمیا دا دێ چ چێبیت؟

هەلبەت بەشەك ژ بەرسڤا ئەڤێ پرسێ دناڤا پرسێ دایە، چەوا هەرێما وەڵاتەکێ لاواز و دروستکریا ئەمەریکا و هەڤاڵبەندێن وێ خۆ لبەندا وێ بهڵاڤێت و هۆشداری و ڕێنمایێن وێ ب گرانی وەرنەگریت و پشتگۆهــ بێخیت، و واشنتۆن بکەڤیتە پاش ئەنقەرە ! هەلبەت ئەڤان بنپێکاریان لسەر بەڕژەوەندیێن ئەمەریکی دێ باجدان هەبیت و کێمتر نابیت ژ ڕژێمێن ژناڤچوویێن پێشتر ب دەستێن ئەمەریکا و هەڤاڵبەندێن وێ .

ئێدی ب ڕوونی دەردکەڤیت کو ئەمەریکا هیڤی و ئۆمێد ب جووت حزبێن ل دەسهەڵاتێ نەمایە، و سەرەدەریێ دگەل ناکەت، و چیدی لژێر سیبەرا خۆ ناپارێزیت و بخۆدان ناکەت و هێدی هێدی ل ئەلتەڕناتیڤ و پێگهۆڕەکی دگەڕیت یان دروست دکەت کو جێبەجێکارا بەڕژەوەندیێن وێ بیت و بساناهی ژ سیاسەتا ئەمەریکی لانەدەت .

ئەڤ گهوڕینا بسەر هزرا ئەمەریکی هاتی بۆ لێگەڕیان یان دروستکرنا پێگهۆڕەکی نها ب ساناهی دسیاسەتا گشتیا ئەمەریکی دا دهێتە دیتن لهەمبەر هەرێما کوردستانێ کو دشێن د سێ خالێن سەرەکی دا کۆمڤەبکەین کو ئەمەریکا تێدا دیارکریە ئێدی ئەم سەرەدریێ دگەل دەستهەڵاتا نها هەی ناکەین .

- خەلاتکرنا نوینەرێ تیما پارێزەرێن کەیسا زیندانیێن سیاسیێن بەهدینان، کو کەسێن دبازنەیا ئەڤێ کەیسێ دا هاتینە گرتن ژلایێ سەرۆکێ کابینەیا نەهێ یا حکومەتا هەرێما کوردستانێ ( کو نها دەم ب سەرڤەچووی و نەیاسایینە ) هاتنە هەژمارتن ب سیخۆر و تێکدەرێن ئاسایشا وەڵات و نیشتیمانی .

ـ هۆشداریێن بەردەوامێن، برێت مەکگۆرك ڕێکخەرێ کۆشکا سپیا ئەمەریکا بۆ پرسێن رۆژهەلاتا ناڤین و باکۆرێ ئەفریقیا .

ـ پەیامێن بەردەوام و نەڕاستەوخۆیێن دەستێبەردانا کۆمەڵگەها ناڤ دەولەتی ژ دەستهەڵاتداریا هەرێمێ ژلایێ، جینێن پلاسخارت نوینەرا تایبەتا سکێرتێرێ گشتیێ نەتەوەیێن هەڤگرتی ل عیراقێ .

ئەڤە ناهێتە ئەوێ واتایێ بشێوەیەکێ لەزگین ئەمەریکا پێگهۆڕەکی بدانیت، بەلکو دبیت دەم بڤەکێشیت هەلبەت ئەمەریکا پشۆدرێژە و وەکو وەلاتیێن هەرێمێ ژئەگەرێ قەیران و دەردەسەریێن دەستهەڵاتا هەی تەنگاڤ نینە .

گەلەری