PM:08:25:23/08/2022
324 جار خوێندراوەتەوە
+
-
جڤاتا دادوەریا عێراقێ ڕاگەهاند، ژ سوبەهی ڤە ل
هەمی دادگەهێن فیدرالی و جڤاتا دادوەری و دادگەها بلندا فیدرالی دەست ب دەواما
ئاساییا خۆ دکەن.
ئەڤرۆ سێشەمبێ، پشتی کو موقتەدا سەدر داخاز ژ ئالیگرێن
خۆ کری پێشیا ئاڤاهیێ جڤاتا دادوەری چۆلبکەن و خۆنیشاندانێن خۆ ل وێ دەڤەرێ ب
هەلاویسن، جڤاتا بلندا دادوەری بڕیاردا ژ سوبەهی ڤە دەست ب دەواما ئاساییا خۆ بکەن.
جڤاتا بلندا دادوەریا عێرقێ ڕاگەهاندنەک
بەلاڤکریە و دناڤدا هاتیە، ب ژبەرچاڤگرتنا ڤەکشیانا خۆنیشاندەران و هەلگرتنا وێ دۆرپێچا
لسەر ئاڤاهیێ جڤاتا بلندا دادوەران دروستکربوو، جڤاتا بلندا دادوەری بڕیاردا ژ سوبەهی
ڤە هەمی ئەو دادگەهێن کارێن خۆ هەلاویستبوون دەست ب کارێ ئاساییێ خۆ بکەن.
د ڕاگەهاندنێ دا ئەڤەژی هاتیە، جڤاتا بلندا دادوەری
سوپاسیا هەمی ئالی و کەساتیێن ناڤخۆیی و بزاڤێن نێڤدەولەتی دکەت کو پشتەڤانی ژ سەروەری و سەربەخۆییا جڤاتا دادوەری ل عێراقێ
کریە.
دبێژیت ژی، هەمی ئالیان پشتراست دکەین کو ریکارێن
یاسایی لهەمبەر وان هەمی کەسان دگرنە بەر کو ژ یاسایێ دەرچووینە و سەرپێچیێن یاسایی
ئەنجامداینە.
ئەڤە د دەمەکیدایە، ئەڤرۆ پشکەک ژ ئالیگرێن باسکا
سەدر ل پێشیا ئاڤاهیێ جڤاتا بلند یا دادوەری خۆنیشاندان کرن و خیمە دانان و ب وێ
سەدەمێ جڤاتا بلندا دادوەری و دادگەها بلندا فیدڕالی کارێن خۆ هەلاویستن.
هەلاویستنا کارین جڤاتا بلندا دادوەری و دادگەها
بلندا فیدڕالی کارڤەدانێن ناڤخۆ و نێڤدەولەتی لدیڤ خۆ ئینان و د هەمبەردا سالح محەمەد
عێراقی، بەرنیاس ب وەزیرێ سەدری د تویتەکێ دا داخاز ژ خۆنیشاندەران کر، پێشیا
ئاڤاهیێ جڤاتا بلندا دادوەری بەردەن و بجهـ بهێلن، لێ خێمەیێن خۆ بهێلن.
پێشترژی دادگەها بلندا فیدڕالیا عێراقی فەرمانا
دەستەسەرکرنێ بۆ چەند ئەندامێن سەرکرداتیا باسکا سەدر دەرێ خستیە، ژوانژی "غایب
عەمیری و سەباح ساعدی و محەمەد ساعدی."هەڤدەم، گەشتکرن بۆ دەرڤەی ولاتی لسەر وان سێ سەرکردەیێن باسکا سەدر قەدەغەکر.