PM:09:37:19/04/2022
3764 جار خوێندراوەتەوە
+
-
جەژنا سەرێ سالێ کو دبێژنێ چارشەمبا سورا ئێزدیان دمەها نیسانێ دا ئێکە
ژ جەژن و هەلکەفتێن هەرە کەڤنارێن دیڤکەفتیێن ئاینێ ئێزدیان، دڤێ مەهێ دا ئێزدی
ژیانا هەڤژینیێ پێکنائینن.
ئیڤاریا ئەڤرۆ ل پەرستگەها لالش زێدەتی ٣٦٦ چرایان
ب بەرهەڤبوونا هزاران کەسان ل سەر ئاستێ ناڤخۆ و دەرڤەی کوردستانێ هاتن هەلکرن و رێورەسمێن
جەژنا چارشەمبا سورا ئێزدیان بریڤەچوو.
سێیەم حەفتی ژ مەها نیسانێ کو رۆژا چارشەمبێ هاتیە دیارکرن؛ جەژنا ئێزدیانە
و دڤێ جەژنێ دا ئیزدی هێکا دکەلینن و وەکی ئاماژەیەکێ یە کو بنێرینا وان گەردون
دڤێ مەھێ دا هاتیە ئافراندن، پشتڕە وان هێکا ڕەنگا و ڕەنگ دکەن ئەوژی وەکی
ئاماژەیەکێ یە بۆ وەرزێ بهارێ و هەر مالەکا سپیدەهیا رۆژا چارشەمبێ بەردەریێ خۆ ب
گۆلێن سۆر بخەملینیت کو دیارکەرا وێیەکێ یە جەژنا وێ مالێ یە.
لدیڤ ژێدەران، سەدەمێ وێیەکێ کو جەژنا وان یا سەرێ سالێ ل سێیەم چارشەمبا
مەها نیسانێ ڤەدگەریت بۆ وێیەکێ، "ل وی دەمی فریشتە مەلیک تاوس هاتیە سەر عەردی".
هەروەسا دمەها نیسانێ دا ئێزدی هەڤژینیێ پێکنائینن ژبەرکو ب نێرینا
وان مەها نیسانێ بیکا سالێ یە و سومبولا ئاڤەدانی و نویبوونێ یە ژبەرهندێ نابیت
هەڤژینیێ تێدا پێکبینن.
هەر لدیڤ باوەریا ئێزدیان، "د سێیەم چارشەمبا مەها نیسانێ دا جیهانا
جەمەدگرتی دحەلیێت و ئافراندن دروست دبیت، ئەڤ بوچوونە زێدەتر تێکەلی روویدانێن
سروشتیبوویە"، ب لێکدانەکا دیا ئاینی ژی، "چارشەمب داوی رۆژا دروستکرنا
گەردوونی یە"، کو ئەڤە هەمی بیروباوەرێن پەیروکەرێن چەند ئاینێن جودانە د جیهانێ
دا و هەمی ئاینان دیتنێن جودا بۆ سروشت و گەردوونی هەنە.
پەرستگەها لالش:
مەراسیمێن چارشەمبا سور ل پەرستگەها لالش برێڤەدچن و ئێزدی ٣٦٦ چرایان
هەلدکەن و ژ هەمی جهێن دونیایێ ئێزدی سەرەدانا وێ پەستگەهێ دکەن.
ئێزدیان پەرستگەهەکا تایبەت بخۆڤە هەنە بناڤێ لالش یان لالەش، کو پەرستگەهەکا
ئاینی یا کوردیێن ئێزدی یە و ئێکە ژ پەرستگەهێن ئاینی یێن جیهانی، دناڤ دولەکا دژۆاردا
ب دووریا ١٢ کێلۆمەتران دکەڤیتە باکورێ رۆژئاڤایێ باژێرێ شێخان ل پارێزگەها دهۆکێ.
لالش، "ب پیرۆزترین پەرستگەها کوردێن ئێزدی دهێتە دانان"،
سالانە دجەژنێن خۆ دا ئێزدی ژ دەرڤەی هەێمێ ژی دهێن و سەرەدانێ دکەن و بەژداری دجەژنێ
دا دکەن.
سالانە بسەدان گەشتیار و دیڤکەفتیێن ئاینێ ئێزدیان گەشتێ بۆ لالشێ دکەن،
دور ژ وێ ژی گەلەک گەشتیارێن ناڤخۆی و بیانی ژی بۆ دیتن و بەژداریکرن د داب و نەریتێن
ئیزدیان دا گەشتێ بۆ لالشێ دکەن.