وێنە.. خۆپێشاندانێن شێخان بەرفرەهتربوون و نێزیکی ١٠ کیلۆمەترێن جاددێ هاتینە گرتن

PM:01:51:25/12/2021

1232 جار خوێندراوەتەوە

+ -

پشتی کو ل شەڤا دەربازبوویی پێنج کەس ژ ئەندامێن خێزانەکێ د بوویەرەکا هاتن و چوونێدا ژیانا خۆ ژدەستداین، وەلاتیێن شێخان ل دژی خرابیا ڕێک و پران، خۆپێشاندانەکا نەڕازیبوونێ ئەنجامدان و د نهادا وەلاتیێن سێ گوندێن دی خۆپێشاندان دەستپێکرن.

نووچەگەهانێ ئێن ئاڕ تی ڕاگەهاند، نیڤرۆیا ئەڤرۆ هەژمارەکا زێدە یا وەلاتیان دەست ب خۆپێشاندانێ کرن و ڕێکا سەرەکیا بازرگانیا دهۆک هەولێر داخستن.

ئاماژە ب وێیەکێ کر، ل هەرسێ گوندێن نسریێ و گوندێ بوزا و گوندێ جەراحیێ ژی خۆ پێشاندان دەستپێکرینە، دبێژیت ژی، ژ ناحیا ئەلقوش هەیا ئۆڤەرپاسا باعەدرێ جاددەیا سەرەکی  کو دبیتە نێزیکی ١٠ کیلۆمەتران ژ ئالیێ خۆپێشاندەرانڤە هاتیە گرتن.

دیارکر ژی، د خۆپێشاندانێ هێزێن ئەولەهیێ بزاڤا بەلاڤکرنا خۆنیشاندەران کریە.

هەڤدەم، پشکەک ژ وان وەلاتیان دیار دکەن، ڕێکا وان یەک سایدە و هاتن و چوونا تڕۆمبێلێن بازرگانی لسەرە و ڕێکا سەرەکیا گوندێن وانە.

بەحسا وێ یەکێ ژی کرن، کو چەندین سالە وان چەندین قوربانی داینە ژبەر خرابیا ڤان ڕێکان و داخازا چارەسەرکرنێ دکەن.

ئەڤە ژی دەمەکێ دایە، شەڤا دەربازبوویی د بویەرەکا ترافیکێ دا لسەر رێیا ئەلقوش - شێخان، پێنج ئەندامێن خێزانەکێ ژیانا خۆ ژ دەستدان و سێ ئەندامێن هەمان خێزان ژی برینداربوون.