PM:11:47:05/12/2021
728 جار خوێندراوەتەوە
+
-
سەرۆکێ هەرێمێ ڕاگەهاند، هێرش و پەلامارێن ڤێ
داوی یێن داعش، مەترسیێن ڕاستەقینەنە بۆ سەر ئارامی و سەقامگێریا عێراقێ و دەڤەرێ
بگشتی و گەفان ل ئاسایشا جیهانی ژی دکەت، دبێژیت ژی، "پێتڤیە هەرێم و عێراق
هەڤبەشانە کارێ جدی تر بکەن بۆ بەرهنگاربوونا تیرۆرێ".
ل گۆرەی ڕاگەهاندنا سەرۆکایەتیا هەرێمێ،
نێچیرڤان بارزانی سەرۆکێ هەرێمێ و ئێریک شوڤالیێ بالیۆزێ فەرەنسا ل عێراقێ جڤیان و
بەحسا وێیەکێ کرن، "ڕاستەرێکرنا
پرۆسەیا سیاسی ل وەلاتی و بوونا ئارامیا سیاسی ب پێڤیەکا ل پێشیێ یە بۆ
بەرهنگاربوونا تیرۆر و تێکشکاندنا ئێکجاریا داعش".
ئاماژە ب وێیەکێ ژی کر، "هەردوو ئالی
هەڤبوچوون بوون بۆ بەرهنگاربوونا تیرۆر و تێکشکاندنا داعش، هاریکاری و هەماهەنگیا
سەربازیا پێشمەرگە و سوپایێ عێراقێ و بەردەوامیا پشتەڤانیا هەڤپەیمانیا نیڤدەولەتی
ل عێراق و هەرێمێ پێتڤیە".
ژ ئالیێ خۆڤە ژی، "بالیۆزێ فەڕەنسا
زێدەباری سەرەخۆشیێ بۆ شەهیدێن ڤێ داویێ ب دەستێ تیرۆرێ ژ پێشمەرگە و وەلاتیان،
بەردەوامیا هەمی هەڤکاری و پشتەڤانیا وەلاتێ خۆ بۆ عێراق و هەرێمێ دووپاتکر".
ل گۆرەی سەرۆکایەتیا هەرێمێ، "دەربارەی
حکومەتا داهاتیا عێراقێ ژی هەردوو ئالیان
تەکەز ل گرنگیا هاتنا حکومەتەکێ کریە کو جهێ ڕازیبوون و کۆمکەرا هێز و پێکهاتەیێن
عێراقێ و لدیڤ داخازی و چاڤەرێ بوونا وەلاتیان ژ ئارامی و ژیانەکا باشتر،
بەرهنگاری تەحەدیێن نها و داهاتی ببیت و رولێ خۆ لسەر پاراستنا ئارامی و
سەقامگێریا دەڤەرێ بگێریت".
هەڤدەم، وەزیرێ پێشمەرگەی
ڕاگەهاند، خەلکێ کوردستانێ پشتراست دکەین پەلامارێن چەکدارێن داعش وان ناترسینیت،
دبێژیت ژی، "هەر زوو دێ تۆلا خوینا وان شەهیدان و هەمی شەهیدێن چەند رۆژێن دەربازبووی
ڤەکەین".
ئەڤە ژی د دەمەکێ دایە، شەڤا ٢ی ڤێ مەهێ، چەکدارێن
داعش هێرشکرنە سەر گوندێ خدرجیجە ل بنارا قەرەچۆغ، د ئەنجامدا ١٣ پێشمەرگە و وەلاتی
شەهیدبوون و چەند کەسێن دی ژی برینداربوون.
د شەڤا ٢٧ی مەها دەربازبووی ژی، ل ناحیا کولەجۆیا
گەرمیان داعش هێرشکرە سەر سەنگەرێن پێشمەرگەی و د دەمەکێ دا هەڤکاری بۆ هێزێن پێشمەرگەی
چوبوو بۆمبەکا چاندی ب ترۆمبێلا پێشمەرگەی ڤە تەقیا و پێنج پێشمەرگە شەهیدبوون و
چارێن دی ژی برینداربوون.
ل ٢٩ی مەها دەربازبووی ژی دا، ل سنورێ کفری ژ
ئالیێ چەکدارێن داعش ڤە هێرشی سەر هێزێن پێشمەرگەی هاتەکرن و د ئەنجامدا دوو پێشمەرگەی
شەهیدبوون و سێ پێشمەرگەیێن دی ژی برینداربوون.
