PM:08:25:05/12/2021
1740 جار خوێندراوەتەوە
+
-
پارێزەرێ دەستەسەرکریێن بەهدینان ڕاگەهاند،
سوبەهی ل دادگەها کەتنا دهۆکێ لسەر کەیسا مەلا ئیحسان رێکانی دادگەهیکرنا رۆژنامەڤان
ئومێد بەرۆشکی دێ برێڤەچیت.
رەمەزان ئەرتیسی پارێزەرێ دەستەسەرکریێن
بەهدینان بۆ ئێن ئاڕ تی ڕاگەهاند، پشتی دادگەهێ رۆژنامەڤان ئومێد بەرۆشکی ب شەش
مەهێن زیندانیکرنێ لسەر کەیسا مەلا ئیحسان رێکانی سزادای شنو ناڤهاتی دەستبەرداری سکالایا خۆ ببوو، لێ دادگەهێ بڕیار لسەر دابوو ژبەر وێیەکێ ئەو سزایە (ئیقاف تنفیز) ڕاگرتنا
جێبەجێکرنێ کر.
دیار ژیکر، هەر چەندە مەلا ئیحسان دەستبەرداری
سکالایا خۆ ببوو، لێ چ کارتێکرن ل بڕیارا دادگەهێ نەکربوو ژبەرکو وی دەمی دادگەهێ
بڕیارا سزادانا شەش مەهێن زیندانیکرنێ بۆ ئومێدی دەرخستبوون، لێ دادگەهێ ئەو سزایە
(ئیقاف تنفیز) ڕاگرتنا جێبەجێکرنێ کربوو، گوتژی، مە تانە ل بڕیارێ دا و دادگەهێ
ئەو سزایە هەلوەشاند لێ بڕیارا داویێ لسەر نەدا و سوبەهی دادگەهیکرن لسەر وێ کەیسێ دێ برێڤەچیت.
بەحسا وێیەکێ ژی کر، ئەگەر ئەوان تانە ل
بڕیارا دادگەهێ نەدابا ئەو سزایێ لسەر کەیسا مەلا ئیحسانی بۆ ئومێدی دەرکەفتی دا
وەکی خۆ هێتە جێبەجێکرن و دستبەرداربوونا ناڤهاتی ژ سکالایێ چ کارتێکرنا خۆ ل
بڕیارا دادگەهێ نەدکر.
ئەڤە د دەمەکێ دایە، ل ١٥ی مەها ٥ یا سالا
دەربازبووی ئومێد بەرۆشکی ژ ئالیێ هێزێن ئەولەهیێ ڤە هاتبوو دەستەسەکرن و حەفت
کەیس لسەر هاتبوونە ڤەکرن کو سوبەهی بۆ جارا هەشتێ یە دێ هێتە دادگەهیکرن، پشتی سزادانا ئومێدی ب
کۆژمەکێ پارەی لسەر کەیسەکێ و سزایێ زیندانیکرنێ لسەر چەند کەیسێن دی پارێزەرێن وی
تانە ل بڕیارێ دان و سەر جەمێ وان سزایان ژی سێ سالێن زیندانیکرنێ بۆ دەرکەتبوون
سزایێ ماددی ژی هاتبوو هەلوەشاندن.