خۆپێشاندانێن خوێندکارێن زانکۆیێن هەرێمێ دەستپێکرن

AM:10:11:05/12/2021

532 جار خوێندراوەتەوە

+ -

خوێندکارێن زانکۆیێن سلێمانیێ و هەلەبجە و راپەرین و کۆیە فاکەلتیا پەروەردەیا قەلادزێ ب مەرەما داخازکرنا مافێن خۆ و پێدانا دەرمالەیان ل پێشیا زانکۆیێن خۆ دەست ب خۆپێشاندانان کر و بایکۆتا هۆلێن خاندنێ کر.

هەروەسا نووچەگەهانێ ئێن ئاڕ تی ل باژێرێ هەلەبجە ڕاگەهاند، خوێندکارێن کۆلیژا تەکنیکی هەلەبجە و پەیمانگەها تەکنیکی هەلەبجە ل پێشیا سەرۆکاتیا زانکۆیا هەلەبجە خڕڤەبوون ئەنجامدا و خوێندکار بەحسا وێیەکێ دکەن، پشتی جڤینا نوینەرێن خوێندکاران دگەل سەرۆکێ حکومەتێ بێ ئەنجام بوون و چ ژ داخازیێن وانا نەهاتنە جێبەجێکرن.

هەڤدەم، نووچەگەهانێ ئێن ئاڕ تی ل سلێمانیێ بەحسا وێیەکێ کر، کو خوێندکارێن زانکۆیا سلێمانیێ بایکۆتا هۆلێن خاندنێ کر و دەرگەهێ سەرەکیێ زانکۆیێ دائێخستیە و رێکێ نادەن چ ترۆمبێلەک بچیتە دناڤ زانکۆیێ دا و خوێندکارێن بەشێن ناڤخۆ دگەل وانا پشکدارن و خوێندکار بەحسا وێیەکێ کریە دەرمالە مافەکێ سەرەکیێ وانایە و پێتڤیە بدەنێ.

ل دەمێن دەربازبووی، ب ئارمانجا باشترکرنا خزمەتگوزاریێن بەشێن ناڤخۆی و دووبارە پێدانا دەرمالەیێن وانا، خوێندکارێن زانکۆیێن هەرێمێ خۆپێشاندان ئەنجامدان و بۆ دەمێ پێنج رۆژان بەردەوامبوو.

بسەدەمێ بەردەوامبوونا خۆپێشاندانان ئالوزی دروستبوو دناڤبەرا خوێندکار و هێزێن ئەولەکاری و هژمارەکا خوێندکار و رۆژنامەڤانان هاتنە دەستەسەرکرن.

ل دەمێ دروستبوونا ئالوزیان چەند پارچەیێن ڤیدیۆیی بەلاڤبوون ل تۆڕێن جڤاکی کو هێزێن ئەولەکاریێ ل خوێندکارێن زانکۆیێ ددەن، ئەڤێ ژی نەرازیبوونێن زێدە یێن وەلاتیان لدویف خۆ ئینان.

هەر بسەدەمێ بەردەوامبوونا خۆپێشاندانێن خوێندکاران، هێزێن ئەولەکاریێن باژێرێ سلێمانیێ چوونە ناڤ حەرەمێ زانکۆیێ و گازا روندک رێژ بۆ بەلاڤەپێکرنا خوێندکاران بکارئینا.

ل پارێزگەها دهۆکێ، هێزێن ئەلەکاری رێک نەدا خوێندکار خۆپێشاندانێ ئەنجامبدەن.

هەروەسا، پشکەک ژ زانکۆیێن هەرێمێ ب ئارمانجا ب داوی ئینان ب خۆپێشاندانان خوێندکاران دەوام راگرت و چەند رۆژەک کرنە بهێنڤەدان.

ژ سالا ٢٠١٤ێ وەرە دەرمالەیێن خوێندکارێن هەرێمێ ل زانکۆ و پەیمانگەهان هاتینە بڕین، کو بەریا نها بۆ خوێندکارێن ناڤ باژێری کوژمێ ٤٠ هزار دیناران و بۆ خوێندکارێن بەشێن ناڤخۆی و کوژمێ ٦٠ هزار دیناران و بۆ خوێندکارێن دەرڤەی باژێری کو بەشێن ناڤخۆی نەبوو کوژمێ ١٠٠ هزار دینار د دانێ، کو وەک خوێندکارێن وی دەمی بەحسا وێیەکێ کر، ئەو کوژمێ پارەی لایەنێ کێم کرێیا هاتن و چوونێ لسەر وانا سڤک دکر.