AM:09:51:14/09/2025
664 جار خوێندراوەتەوە
+
-
بڕیارە ئەڤرۆ کۆمسیۆنا عێراقێ تیروپشکێ بۆ کارمەندێن بنگەهێن دەنگدانێ
بکەت، ٢٥٠ هزار کەس دێ هێنە وەرگرتن و مووچەیێ کو بۆ وان هاتیە دیارکرن کو د ناڤبەرا
١٥٠ هزار بۆ ٤٠٠ هزار دینارانە.
جومانە غەلای، پەیڤدارا کۆمسیۆنا بلندا سەربەخۆیا هەلبژارتنێن عێراقێ
راگەهاند، تیروپشک دەمژمێر ١١ـی بەری نیڤرۆ ل نڤیسینگەها کۆمسیۆنێ ل بەغدا دێ ب
رێڤەچیت.
ئاماژە ب وێ یەکێ ژیکر، جڤاتا کۆمسیاران هویربینیێن پارەیێ کارمەندێن
دەنگدانێ دیارکریە کو ل ١٥٠ هزار دیناران دەستپێدکەت بۆ ٤٠٠ هزار دیناران.
لدویف بڕیارا جڤاتا کۆمسیاران، ئەگەر ئەو کارمەنێن دەنگدانێ کو دهێنە
وەرگرتن فەرمانبەرێن حکومی بن و هەڤبەندێ ناڤەندا دەنگدانێ بیت، ٣٠٠ هزار دیناران
دێ وەرگرن و ئەو بڕە پارە بۆ ئێک رۆژا دەنگدانا گشتی یان تایبەت دێ هێتە وەرگرتن،
لێ ئەگەر کارمەندێ دەنگدانێ رێڤەبەرێ وێستگەها دەنگدانێ بیت ٢٠٠ هزار دینار دێ پێ
هێنە دان و ئەگەر فەرمانبەرێن ناڤەند یان وێستگەهێن دەنگدانێ ژی بن دێ ١٥٠ هزار
دینارێن دی وەرگرن.
ئەگەر کارمەندێ دەنگدانێ قوتابی یان دەرچوویێ زانکۆیێ بیت و کارێ هەڤبەندێ
ناڤەندا دەنگدانێ بیت، دێ ٤٠٠ هزار دیناران وەرگریت، ئەگەر رێڤەبەرێ ناڤەندێ بیت ٣٠٠
هزار دیناران و ئەگەر یێ ناڤەند یان وێستگەها دەنگدانێ بیت دێ ٢٥٠ هزار دیناران
وەرگریت.
ئەو کارمەندێن کو وەکو یەدەگ ژی دهێنە وەرگرتن و رێژەیا وان ٥٪ـێ هەمی
وان کارمەندانە کو دهێنە وەرگرتن، ئەگەر فەرمانبەرێ حکومی بیت ٥٠ هزار دینار و
ئەگەر قوتابی یان دەرچوویێ زانکۆیێ بیت دێ ١٠٠ هزار دیناران وەرگریت.