PM:06:41:26/07/2021
6328 جار خوێندراوەتەوە
+
-
ل تۆرێن جڤاکی وێنەیێن کچەکێ بناڤێ نەدا کو
خەلکا قەزا زاخۆیە بەلاڤبوویە و دبێژن، ل دەما دروستکرنا ڤیتیەکا سناپی گولەیەک ژ
دەستێ وێ دەرکەتیە و بوویە سەدەمێ ژیان ژ دەستدانا وێ، لێ ئێن ئاڕ تی دیڤچوون بۆ
وی بابەتی کریە و بوچوونێن جودا لسەر بابەتی هەنە و پۆلیس ژی دبێژن، "دەستپێکا
بوویەرێ ئەو دوسەیە نەهاتیە بۆ پۆلیسان و دنهادا پەرێن ڤەکۆلینێ
دەستپێکرینە".
کەسەکی نێزیک ل وێ کچێ بۆ ئێن ئاڕ تی
ڕاگەهاند، نەدا د مالدا مژیلی سناپکرنێ بوو ب دەمانجێ، لێ گولەیەک ژ دەستی
دەرکەتیە و برینداربوویە و پشترە بۆ نەخۆشخانەیا هەوارهاتنێ ل دهۆکێ هاتیە
ڤەگۆهاستن.
ئاماژە ب وێیەکێ ژی کر، بویەر نێزیکی ١٠ رۆژان
بەریا نها بوویە، ژ هنگی وەرە نەدا د نەخۆشخانەیێ دا بوو و پشترە ل نەخۆشخانێ ب
سەدەما دژواریا برینا خۆ ژیانا خۆ ژ دەستدایە.
لهەمبەر گوتنێن کەسێ نێزیک ژ نەدایێ شاهد حالەکێ هایدار بۆ ئێن ئاڕ تی
ڕاگەهاند و گوت، نەدایێ خواستیە دگەل کەسەکی هەڤژینیێ پێکبینیت، لێ رێگری لێ هاتیەکرن
و هەر ب وێ سەدەمێ تەقە ل خۆ کربوو هەیا بوویە سەدەمێ وێیەکێ ژیانا خۆ ژ دەست بدەت.
هەڤدەم، نەهشەت سەلمان پەیڤدارێ پۆلیسێن زاخۆ
بۆ ئێن ئاڕ تی ڕاگەهاند، "بویەرا برینداربوونا وێ کچێ نێزیکی ١٠ رۆژان بەریا
نها بوویە و ئەو کچە گەهاندنە نەخۆشخانێ کو ب گولەیەکێ بریندارببوو و پشترە ژیانا
خۆ ژ دەستدایە".
پەیڤدارێ پۆلیسێن قەزا زاخۆ بەحسا وێیەکێ ژی
کر، ل دەستپێکا بوویەرێ ئەو دوسەیە نە هاتیە دەف پۆلیسان، لێ دنهادا ڤەکۆلینان
لسەر وێ بوویەرێ دەستپێکریە و هێشتا ڕاستیا بابەتی ئاشکرا نەبوویە.