PM:11:20:12/04/2025
368 جار خوێندراوەتەوە
+
-
ب مەرەما جێبەجێکرنا رێککەفتنا دناڤبەرا مەزلووم کۆبانێ و
ئەحمەد شەرع دا بۆ پاراستنا بەنداڤا تشرین ژ هێرشێن لەشکەری، سەرۆکێ لیژنەیا ئەرکدارکریا
حکومەتا نوی یا سوریا سەردانا فەرماندەیێ گشتی یێ هێزێن سوریا دیمۆکرات کر.
ئەڤرۆ شەمبی ١٢ـێ نیسانا ٢٠٢٥، ناڤەندا راگەهاندنا هێزێن
سوریا دیمۆکرات (هەسەدە) راگەهاندنەک بەلاڤکر و تێدا هاتییە؛ مەزلووم کۆبانێ، فەرماندەیێ
گشتی یێ هەسەدە و فەرماندەیێ گشتی یێ یەکینەیێن پاراستنا ژنان ل باژێڕێ حەسەکە پێشوازیا
حوسێن سەلامە، سەرۆکێ لیژنەیا ئەرکدارکریا حکومەتا دیمەشقێ کر.
ئاماژە ب وێیەکی ژیکریە، سەردان بۆ جێبەجێکرنا رێککەفتنا
(١٠ـێ ئادارا ٢٠٢٥) بوویە یا کو دناڤبەرا مەزلوم عەبدی و ئەحمەد شەرع، سەرۆکێ سوریا
بۆ قۆناغا ڤەگوهێزەر هاتبوو ئەنجام دان.
د دیدارێ دا، هەردوو ئالیان تەکەز ل جێبەجێکرنا بڕگەیێن
رێککەفتنێ کر و بەحس ل پێدڤییا بەردەوامبوونێ ل کێمکرنا تووندوتیژی و راوەستاندنا
شەڕ و پێکدادانان ل سوریا کر، ب تایبەتی پاراستنا بەنداڤا تشرین ژ هێرشێن لەشکەری.
ناڤەندا راگەهاندنا هێزێن سوریا دیمۆکرات راگەهاند ژی، د
کۆمبوونا دناڤبەرا هەسەدە و سەرۆکێ لیژنەیا ئەرکدارکریا حکومەتا دیمەشق دا، بەحس ل
پێکهێنانا لیژنەیەکێ هاتە کرن بۆ گۆتووبێژکرنا ڤەگەڕاندنا ئاوارەیان ل هەموو دەڤەرێن
سوریا.
هەروەسا هەر د کۆمبوونێ دا، بۆ گۆتووبێژکرن دگەل حکومەتا
دیمەشقێ، ناڤێن ئەندامێن وێ لیژنەیێ ئاشکرا کرن یێن کو نوونەرایەتی رۆژئاڤا دکەن و
بڕیار ژی دایە دەست ب کارێن خو بکەن.