PM:12:12:20/12/2024
484 جار خوێندراوەتەوە
+
-
نوینەرێ بایدن سەرۆکێ ئەمریکا ل رۆژهەلاتا ناڤاراست، گەهشتە
دیمەشق و بڕیارە ئەڤرۆ دگەل ئەحمەد شەرع، سەرۆکێ دەستەیا تەحریر شام کۆم ببیت.
ئەڤرۆ ئەینیێ 20ـێ 12ـێ 2024، وەزارەتا دەرڤەیا ئەمریکا
ڕاگەهاند، شاندەکێ دیبلۆماسیێ ئیدارەیا بایدن گەهشتیە دیمەشق یا پایتەختێ سوریا و بڕیارە
دگەل ئەحمەد شەرع سەرۆکێ دەستەیا تەحریر شام کۆم ببیت.
ئەڤە ژی د دەمەکی دایە، تا نوکە ئەحمەد شەرع و گروپێ وی
د لیستا تیرۆرا ئەمریکا دانە.
هەڤدەم، هەر ئێک ژ باربارا لیف، هاریکارا وەزارەتا
دەرڤەیا ئەمریکا بۆ کاروبارێن رۆژهەلاتا ناڤین و دانیال رۆبینستاین، نوینەرێ بەرێ
یێ ئەمریکا بۆ کاروبارێ سوریا ئەندامێن وێ شاندێ نە و دگەل ئەحمەد شەرع کۆم دبن.
ئەڤ سەرەدانە ژی د دەمەکی دایە، بەریا نوکە ئەحمەد شەرع
یێ بەرنیاس ب محەمەد جۆلانی، داخاز ژ جڤاکا نیڤدەولەتی کر سزایێن سەر گروپێ وی و سوریا
هەلبگرن، تا بشێن رەوشا ئابوریا سوریا و خەلکێ وێ جارەکا دی سەقامگیر بکەن.
هەروەسا، پشتی هەرفینا دەستهەلاتا بەشار ئەسەد ل 8ـێ
مەها 12 یا ئەڤسالە، چەند جاران ئەنتۆنتی بلینکن، وەزیرێ دەرڤەیێ ئەمریکا
ڕاگەهاندیە واشنتن دخازیت دەستهەلاتدارێن نوی یێن دیمەشق، حکومەتەکا بنگەهـ فرەهـ
پێکبینن کو هەمی نوینەرێن سوریا تێدا پشکدار بن و رێز ژ مافێن پێکهاتەیان و
ئافرەتان بگرن.
بەرپرسێن ئەمریکا بۆ میدیایێن وەلاتی ڕاگەهاندینە،
ئەمریکا جێبەجێکرنا وان داخازیان کرینە مەرج بۆ لادانا تەحریر شام د لیستا تیرۆرێ
دا.
سەرەدانا شاندێ ئەمریکا پشتی وێ یەکێ دهێت کو د هەیاما
حەفتیا دەربازبووی دا، هەر ئێک ژ وەلاتێن بەریتانیا، فەرەنسا و ئەلمانیا شاندێن
دیبلۆماسی هنارتنە دیمەشق و دگەل سەرۆکێ دەستەیا تەحریر شام کۆم بوون.