PM:02:34:07/07/2024
268 جار خوێندراوەتەوە
+
-
دووەم گەرا هەلبژارتنا پەرلەمانێ فەرەنسا کو نێزیکی ٥٠ ملیۆن کەسان مافێ
دەنگدانێ تێدا هەیە دەست پێکریە، دهێتە پێشبینی کرن پارتێن راسترەوێن ئۆپۆزسیۆنێ
زۆربەیا کورسیان بدەستڤە بئینن.
پشتی ٥٢ سالان
ژ دروستبوونا وێ پارتا خرڤەبوونا ئۆپۆزسیۆنا راسترەو ل فەرەنسا چاڤ لسەر گرتنە
دەستا دەستهەلاتێ و ب دەستڤەئینانا خاستا گەلێ فەرەنسایە ب ئەنجامدانا گۆهرینان.
بایێ
گۆهرینانان زۆربەیا وەلاتێن ئەوروپا ڤەگرتیە و لدویف راپرسیان پارتا خرڤەبوونا
راسترەو کو ژ ئەندامێتیا فەرەنسا د ئێکەتیا ئەوروپا دا ب گومانە، دێ بیتە بهێزترین
فراکسیۆن د پەرلەمانی دا، لێ رەنگە نەشێت ژ کۆما ٥٧٧ کورسیێن پەرلەمانی زۆربەیا
کورسیێن خۆ کو ٢٨٩ کورسی نە مسۆگەر بکەت و دڤێت دگەل پارتێن ئۆپۆزسیۆنێن هەڤپەیمان
حکومەتێ پێک بینیت.
هەر چەوا بیت،
ئەنجامێن نەچاڤەرێکریێن هەلبژارتنێ ئیمانوێڵ ماکرۆن کو هەلگرێ پرۆژەیێ ئەوروپایە
نەچار دکەت سەرەدەریێ دگەل حکومەتەکێ دا بکەت کو دژی وی پرۆژەیە.
چاڤدێر وەسا
دبینن سیاسەتا دەرەکی و بەرەڤانیا ئیمانوێل ماکرۆن ب زێدەبوونا هەژموونێ پارتێن
راسترەوێن توندرەو کاریگەر دبیت و تا داویا پۆستێ وی ژی ل ٢٠٢٧ـێ د رەوشەکا ئاسێ
مای دا دبیت.
هەر وەسا رەنگە
رۆلێ ماکرۆن وەکی کەسایەتیەکێ کاریگەر د کاروبارێن ئەوروپا و جیهانێ دا تەسک ببیت،
ب تایبەتی د شەڕێ ئۆکرانیا دا.
ئەڤە د دەمەکی دایە، ئێک ژ خالێن گرنگ بۆ دەنگدەران پرسا کۆچىەر و
پەنابەرانە، کو راسترەوان د بەرژەوەندیا خۆ دا بکارئینا، هەروەسا بابەتێ مووچەی و
تەمەنێ خانەنشینیێ و شەڕێ ئۆکرانیا و کەرتێ غەززە و پەیوەندیێن فەرەنسا دگەل
ئەفریقیا کۆمەکا پرسێن دی نە.
ژ لایەکێ دی ڤە ئێکەتیا ئەوروپا ب هویری چاڤدێریا ئەنجامێن هەلبژارتنێ دکەت
و ترس هەیە کاریگەریێ لسەر سیاسەتا وان دروست بکەت، ب تایبەتی لسەر دۆسەیا پەنابەریێ.
بەرەیا نیشتیمانیا راسترەو ب سەرۆکاتیا جۆردان باردێلا سۆزا دایە کو ئەگەر
د هەلبژارتنان دا سەرکەڤیت قەبارەیا باجان کێم بکەت ب تایبەتی د بیاڤێ ئەنەرژیێ
دا، هەروەسا ژیێ خانەنشینیێ ژ ٦٤ سالان بکەنە ٦٠ سال.
گەرا ئێکێ یا
هەلبژارتنان ژی کو ل ٣٠ حوزەیرانێ بڕێڤەچوو، پارتێن راسترەوێن توندرەو نێزیکی
٣٤٪ـێ یا دەنگان و پارتێن چەپێن سۆسیالست ٢٨٪ـێ یا دەنگان و پارتا ئیمانوێل ماکرۆن
ژی ٢٢٪ـێ یا دەنگان ب دەستڤە ئینان.
رێژەیا پشکداریێ ژی د گەرا ئێکێ دا نێزیکی ٧٠٪ـێ بوو کو ئەڤەژی دیرۆکی بوو،
هەروەسا هاتیە پێشبینی کرن د گەرا دوویێ دا ژی پشکداریا وەلاتیان چر بیت و د
ئاستەکێ بلند دابیت.
وێ هەلبژارتنێ ژی کو نێزیکی ٥٠ ملیۆن کەسان مافێ دەنگدانێ تێدا هەیە، پشتی
بڕیارەکا ماکرۆنی سەرۆکێ فەرەنسا دهێت بۆ هەلوەشاندنا پەرلەمانێ وی وەلاتی، سەدەمێ
وێ ژی سەرکەفتنا پارتا راسترەوا توندرەوا فەرەنسا بوو د هەلبژارتنێن پەرلەمانێ
ئێکەتیا ئەوروپا دا.