PM:02:31:25/03/2023
2016 جار خوێندراوەتەوە
+
-
هژمارا ژیان ژ دەستدانێ ب سەدەمی هێرشا ئەمریکا
بۆ سەر کوگەهەکا ئیرانێ ل سوریا بۆ ٢٣ کەسان بلند بوو و سەرۆکێ ئەمریکا ژی گەفا ل
ئیرانێ دکەت.
بەرێ سپێدەهیا دوهی ئەینی، بالەفرێن ئەمریکا د
ئۆپەراسیۆنەکێ دا بناڤێ "لێدانا خویناوی" کۆگەهەکا سوپایێ پاسداران ل
ئەلبوکەمال یا رۆژهەلاتا دێرەزۆرێ و
سەربازگەهەکا دیا هێزێن ئیرانێ ل جەرگێ باژێرێ ئەلمەیا دین بۆردومانکر و ب وێ
سەدەمێ ٢٣ کەسان ژیانا خۆ ژ دەستدان.
ئەڤەژی پشتی وێ دهێت، ب گۆتنا ئەمریکا هێرشا وان
بەرسڤا هێرشەکا ئیرانێ بوو بۆ سەر هێزێن ئەمریکا ل سوریا کو ب وێ سەدەمێ
بەلێندەرەکێ ئەمریکی هاتە کوشتن و پێنج سەربازێن ئەمریکی ژی ل سوریا بریندار بوون
و وی ولاتی ژی بەرپرسیاریا وێ ئێخستە ستۆیێ بالەفرەکا بێ بالەفرڤان یا ئیرانێ.
هەڤدەم، جۆ بایدن سەرۆکێ ئەمریکا هایداری دایە
ئیرانێ کو ئەمریکا رێکارێن بهێز بۆ پاراستنا ئەمریکییان دگریتەبەر گۆتژی، "ب پشتڕاستی
ئەمریکا بزاڤان ناکەت بچیتە ناڤا هەڤرکیان دگەل ئیرانێ، لێ ئاگەهداربن ئەم دێ ب هێزێ
گەلێ خۆ پارێزین".
د دیدارەکێدا دگەل تەلەفزیۆنا سی ئێن ئێنا ئەمریکی
جۆن کێربی پەیڤدارێ ئاسایشا نشتیمانیا ئەمریکا ل کۆچکا سپی گۆت، تا نهاژی رێکخراوا
داعش و گروپێن چەکدارێن نێزیک ژ ئێرانێ گەفن لسەر سەربازێن ئەمریکی ل سوریا.
ئەڤەژی پشتی وێ دهێت، وەزارەتا بەرەڤانیا ئەمریکا
راگەهاند، هێرشێن وان بەرسڤا هێرشەکا بالەفرێن بێ بالەفرڤان بوویە بۆسەر بنگەهەکێ
هێزێن هەڤپەیمانان ل نێزیک حەسەکێ کو بوویە سەدەمێ کوشتنا بەلێندەرەکێ ئەمریکی و
برینداربوونا پێنج کەسێن دی.
هەڤدەم، لوید ئۆستن وەزیرێ بەرەڤانیا ئەمریکا بەحسا
وێ ژی کر، ئەنجامدانا هێرشێن ئەمریکا بۆ سەر هێز و گروپێن چەکدارێن سەر ب ئیرانێ
راستەوخۆ ل ژێر فەرمانا جۆ بایدنێ سەرۆکێ ئەمریکا هاتینە ئەنجامدان.